कांग्रेसं ७७ जिल्लाय् छक्वलं विरोध प्रदर्शन याइगु
पोहेलागा चतुर्थी ११४१, माघ १९ सोमवाः
नेपाली कांग्रेसं १३गू भातृ संगठनं थौं ७७ जिल्लाय् छक्वलं विरोध प्रदर्शन याइगु जूगु दु ।
छगू विज्ञप्ति पितब्वया कांग्रेसं प्रधानमन्त्री केपी शर्मा ओलीया प्रतिनिधिसभा विघटनया असंवैधानिक व अलोकतान्त्रिक पलायाविरुद्ध प्रदर्शन यायेत्यंगु खः ।
थौंया प्रदर्शनय् ब्वति कायेत देय्यंकया सदस्य, समर्थक, शुभचिन्तकपिन्त कांग्रेसं इनाप याःगु दु ।
प्रदर्शन याइगु कांग्रेस भातृ संगठनय् नेपाल महिला संघ, नेपाल तरुण दल, नेपाल विद्यार्थी संघ, नेपाल प्रजातन्त्र सेनानी संघ, नेपाल किसान संघ, नेपाल दलित संघ, नेपाल भूतपूर्व सैनिक संघ, नेपाल आदिवासी जनजाति संघ, राष्ट्रिय लोकतान्त्रिक अपाङ्ग संघ, नेपाल मुस्लिम संघ, नेपाल राष्ट्रिय मगर संघ व नेपाल ठाकुर समाज जूगु कांग्रेसं जानकारी बिउगु दु ।