क्वार्ड पुचः राष्ट्रत चीनया खोप कुटनीतिया एकाधिकार त्वाःथलेत एकमत, २०२२ या लिपातक्कय् १ अर्ब डोज भ्याक्सिन दयेकिगु
सिल्लागा आंैसी ११४१, फागुन २९ सनिवाः
अमेरिका, भारत, अष्ट्रेलिया व जापानं सन् २०२२ या अन्त्यतक्कय् एशियाय् १ अर्ब स्वयां आपाः कोरोनाविरुद्धया खोप उपलब्ध याकेगु आर्थिक ग्वाहालि बीगु प्रतिवद्धता प्वंकूगु दु ।
प्यंगू शक्तिशाली राष्ट्रतय् पुचः क्वार्डया सम्मेलनय् उगु राष्ट्रतय्सं कोरोनाविरुद्धया खोप उपलब्ध याकेगु प्रतिवद्धता प्वंकूगु खः । उगु राष्ट्रतय्सं खोप निर्माण, वितरण क्षमता विस्तार व आर्थिक ग्वाहालिया लागिं प्रतिवद्धता प्वंकूगु खः ।
दक्षिणपूर्वी एशियाय् चीनय् उत्पादन जूगु खोपया प्रभाव अप्वःगु धासें उगु राष्ट्रतय्सं एशियाय् थःपिन्सं दयेकेगु खोप वितरण यायेत सहमति क्यंगु खः ।
एशियालिसें हलिंन्यंक चीनया खोप कुटनीति बल्लानावंगु धासें उगु राष्ट्रतय्सं खोपय् दुगु चीनया एकाधिकार त्वाःथलेत सहमति क्यंगु समाचार संस्था रोयटर्सं न्ह्यथंगु दु ।
थुगु राष्ट्रतमध्ये भारत दक्कले अप्वः खोप उत्पादन याइगु राष्ट्र खः । छुं दिं न्ह्यः भारतीय विदेशसचिव हर्षवद्र्धन श्रृंगालं प्यंगू राष्ट्रं थःगु स्रोत साधन छ्यलाः खोप उत्पादन, भण्डारण व वितरण क्षमता थकायेत सहमति जूगु धयादीगु खः ।
Categorized in अन्तर्राष्ट्रिय
