बेलायतय् स्वक्वःगू झ्वःया खोपया परीक्षण
पोहेलागा पारु११४१, माघ १६ शुक्रवाः
अमेरिकी बायोटेक्नोलोजी कम्पनी नोभाभ्याक्सं परीक्षणया झ्वलय् दुगु कोभिड भ्याक्सिनया प्रभावकारीता ८९ प्रतिशत दुगु दावी याःगु दु ।
संयुक्त अधिराज्यय् १५द्वःम्हेसिके याःगु परीक्षणय् थज्याःगु लिच्वः वःगु कम्पनीं न्ह्यथंगु दु । परीक्षणय् दुथ्याःपिं प्यब्वय् छब्व स्वयां आपाः सर्वसाधारण ६५ दं च्वय्यापिं दुगु बीबीसीं न्ह्यथंगु दु ।
बेलायतपाखें न्ह्याःगु धयातःगु संक्रमण तच्वः जुइगु न्हूगु स्वरुपया भाइरस न्यनाच्वंगु इलय् परीक्षण याःगु खः । थुगु खोपं न्हूगु कथंया भाइरसपाखें तकं सुरक्षित याइगु धाःगु दु ।
अधिकारीतय् कथं दक्षिण अफ्रिकाय् खनेदुगु न्हूगु स्वरुपया भाइरसया संक्रमण अझं तच्वः दु । बेलायतया प्रधानान्त्री बोरिस जोनसनं कोराना खोपसम्बन्धी न्हूगु परीक्षण सुखद बुखँ जूगु धासें लसकुस यानादीगु दु ।
वय्कलं आः उकियात थःगु देय्या स्वास्थ्य नियामकं जाँच याइगु नं धयादिल । बेलायतं थःगु हे देय्या स्टकटन–अन–टिज शहरय् उत्पादन जुइगु थुगु खोपया ६ क्वःति मात्रा सुनिश्चित यायेधुंकूगु दु ।
नियामकपाखें छ्यलाबुलाया लागिं लँ चाःगु हकय् खोपया उगु डोजत सन् २०२१ या निगूगु अर्धवार्षिक इलय् उपलब्ध जुइगु अपेक्षा याःगु दु ।
अक्सफर्ड विश्वविद्यालयं विकास याःगु खोप धुंकाः नोभाभ्याक्स यूकेय् तःधंगु ल्याखय् परीक्षण याःगु निगूगु खोप खः । स्वंगूगु चरणया परीक्षणया इलय् थ्व कोभिड–१९ पाखें तापाकेत ८९ दशमलव ३ प्रतिशत प्रभावकारी खनेदुगु खः ।
