चिनियाँ खोप न्ह्यात, न्हापांगु डोज काःपिन्त वैशाख ७ गते निसें निगूगु मात्रा बिइगु
लहनान्युज | चौलाथ्व द्धितीया ११४१,बैसाख १ बुधवाः
चीनं हःगु कोरोनाविरुद्धया खोप भेरोसेल ४० दँ निसें ५९दँ वैंश पुचःया सर्वसाधरणयात तयेकेगु न्ह्यागु दु । म्हिगः निसें हे चालक व सहचालकलिसें अत्यावश्यक सेवाय् खटे जूपिं १८दँ निसें ६०दँ वैंशया मनूयात नं खोप तयेकेगु निर्णय जूगु स्वास्थ्य तथा जनसंख्या मन्त्रालयं न्ह्यथंगु दु ।
स्वास्थ्यकर्मी फार्मेसीया कर्मचारी, सार्वजनिक यातायातया चालक व सहचालकलिसें अत्यावश्यक सेवाय् खटेजूपिं मनूयात नं चिनियाँ खोप तयेकिगु जूगु दु । अथेहे ४० दँ निसें ५९ दँ वैंशया सर्वसाधारणं नं खोप केन्द्रय् वना कोरोनाविरुद्धया खोप कायेफइगु मन्त्रालयं न्ह्यथंगु दु । थुगु खोप वैशाख ५ गते तक्क थी थी २३गू केन्द्रपाखें तयेकेगु मन्त्रालयं न्ह्यथंगु दु । चीनं अनुदानय् बिउगु ८गू लख डोज खोप चैत १६ गते येँय् हयेत्यंगु खः ।
थुखे, कोरोनाविरुद्धया न्हापांगु खोप अभियान अन्तर्गत न्हापांगु डोज तःपिन्त वइगु वैशाख ७ गते निसें निगूगु मात्रा बिइगु जूगु दु । न्हापांगु झ्वलय् स्वास्थ्यकर्मी, सरकारी कर्मचारी, सुरक्षाकर्मी, सरसफाइकर्मी, पत्रकार, कूटनीतिक नियोगया कूटनीतिज्ञ लिसें कर्मचारी, सार्वजनिक संस्थान व बैंक तथा वित्तिय संस्थानया कर्मचारीलिसेयापिन्त भारतय् निर्मित कोभिसिल्ड खोपया न्हापांगु डोज बिउगु खः ।
न्हापांगु डोज कायेधुंकुपिन्त वैशाख ७ निसें ११ गते तक्क निगूगु डोजया खोप बिइगु बागमती प्रदेशया सामाजिक विकास मन्त्रालय अन्तर्गत स्वास्थ्य निर्देशनालयं न्ह्यथंगु दु । माघ १४, १५, १६, १७ व २६ गते खोपया न्हापांगु डोज काःपिन्त वैशाख ७ गते, माघ १८, १९, २०, २१ व २७ गते न्हापांगु डोज काःपिन्त वैशाख ८ गते निगूगु डोज बिइत्यंगु दु ।
अथेहे माघ २२, २३, २४, २८ व फागुन २ गते न्हापांगु डोज काःपिन्सं वैशाख ९ अले माघ २९ व फागुन ३, ४, ५ व ६ गते न्हापांगु डोज काःपिन्सं वैशाख १० गते निगूगु डोजया खोप कायेगु व्यवस्था याःगु दु । अथेहे माघ ३० व फागुन ७, ८, ९ व १० गते न्हापांगु डोज काःपिन्त वैशाख ११ गते निगूगु डोजया खोप बिइगु न्ह्यथंगु दु । सरकारं माघ १४ निसें फागुन १० गते तक्क न्हापांगु चरणया खोप अभियान न्ह्याकुगु खः ।
Categorized in राष्ट्रिय
