स्वास्थ्य मन्त्रालयं खोप न्यायेत फ्वन ग्वःहालि
डंगोल | थिंलागा आमै ११४१ (२०७७ पुस २९ गते) बुधबाः
स्वास्थ्य लिसें जनसंख्या मन्त्रालयं कोरोना भाइरस विरुद्धया खोप न्यायेत ग्वःहालि फ्वंगु दु ।
मन्त्रालयं बुधबाः छगू सूचं पिथंसें खोप न्यायेत कोषय् ग्वःहालि याये दातृनिकाययात आह्वान याःगु खः ।
दक्व नागरिकतय्त सितिक्कं खोप बिइगु धासें मन्त्रालयं दातृ निकाय, विदेशी, थीथी व्यवसायिक लिसें सामाजिक व परोपकार संस्थायां ग्वःहालि यायेत इनाप याःगु खः ।
खोपया न्यायोचित कथं इनेत तःधंगु ल्याखय् धेबाः माःगु जूगुलिं ग्वःहालिया इनाप यानागु सूचंखय् न्ह्यथनातःगु दु ।
खोप हयेगू तयारी क्वःचाय्धुंकुगु धयावयाच्वंगु मन्त्रालयं भण्डारण यायेगु क्षमता तकं अप्वयेकेधुंकागू धाःगु दु ।
आः खोप हयेत धेबाः माग याःगू सूचं पिथंसेलि खोप हइगु पक्का जुईला धैगु आशा जनमानसय् ब्वलंगू दु ।
थुखे रसियां दयेकूगु कोराना खोप ‘स्पुतनिक भी’ याकनं नेपालय् उपलब्ध यायेत तयार जूगु धाःगु दु ।
अन्तर्राष्ट्रिय समाचार संस्था रोयर्टर्सया कथं २गू क्वःति ५०गू लखः डोज खोप बिइत रुस तयार जूगु न्ह्यथंगु दु ।
छुं लाः न्ह्य रसियां नेपालयात खोप बीत तयार जूगु स्वास्थ्य मन्त्रालयं नं धाःगु खः ।
स्वास्थ्यमन्त्री हृदयश त्रिपाठीं भारत, चीन, रसिया थें जाःगु देय् नाप खोपया बारे सहलह जुयाच्वंगु धयादिइगु दु ।
