दाहाल–नेपाल पुचःया थौं येँय् शक्ति प्रदर्शन
पोहेलाथ्व नवमी ११४१, माघ ९ शुक्रवाः
प्रतिनिधिसभा विघटनया विरोधय् नेकपाया दाहाल–नेपाल पुचलं थौं येँय् शक्ति प्रदर्शन यायेत्यंगु दु ।
छगू लख कार्यकर्ता क्वकायेगु आज्जुलिसें थुगु पुचलं विशाल शक्ति प्रदर्शन धाःगु थौंया ज्याझ्वलय् स्वनिगः व जःखःया जिल्लापाखें तकं कार्यकर्ता क्वकायेगु तयारी दु ।
दाहाल–नेपाल पुचलं थौं सुथय् ११ताः इलय् येँ व यलया थीथी गुथासं जुलुस पिकायेत्यंगु दु । फिब्व, डिल्लीबजार, लैनचौर, त्रिपुरेश्वर, कोपुन्ड्वः, प्रदर्शनीमार्ग, त्रिचन्द्र कलेज, शान्तिबाटिका लिसेंया थासं जुलुस पिहांवइ ।
थीथी थासं पिहांवइगु जुलुस रत्नपार्कय् मुनाः मूल जुलुसय् हिली ।
उगु मूल जुलुस रत्नपार्क, बागबजार, पुतलीसडक, प्रदर्शनीमार्ग, भद्रकाली, सहिदगेट, लुँहिति, भोताहिति, पुलांगु बसपार्क जुयाः भृकुटीमण्डपय् थ्यंकाः सभाय् हिलीगु संघर्ष समितिया कजि नारायणकाजी श्रेष्ठं जानकारी बियादिल ।
जुलुसया ब्वतिमितय्त पार्टीं क्वःछ्यूगु नारा जक थ्वयेकेत निर्देशन ब्यूगु दु । दाहाल–नेपाल पुचलं संसद विघटनया असंवैधानिक पलाः मभिंकूतल्ले आन्दोलन न्ह्यानाच्वनीगु न्ह्यथंगु दु ।
सभायात नायःद्वय पुष्पकमल दाहाल व माधवकुमार नेपाल लिसेंया नेतातय्सं सम्बोधन याइगु ज्याझ्वः दु ।
Categorized in राजनीति
