सभापति देउवा संवैधानिक परिषदया मुँज्याय् मवनिगु
चौलागा द्धादशी ११४१,बैसाख २५ सनिवाः
नेपाली कांग्रेसया सभापति शेरबहादुर देउवां प्रधानमन्त्री केपी शर्मा ओलीं सःतुगु संवैधानिक परिषदया मुँज्याय् मवनेगु स्पष्ट यानादिगु दु ।
थौं छगू विज्ञप्ति जारी याना वय्कलं कन्हेया नितिं सःतुगु संवैधानिक परिषदया मुँज्याय् मवनेगु स्पष्ट यानादिगु खः । कांग्रेस सभापति देउवां मूँ प्रतिपक्षी दलया नेताया हैसियतं थः मुँज्याय् ब्वति मकायेगु उल्लेख यानादिगु खः ।
अध्यादेशपाखें संवैधानिक परिषद्सम्बन्धी ऐनया संशोधन याना लोकतान्त्रिक अभ्यासय् सरकारं प्रहार याःगु मेमेपिं दुजःपिन्त तकं मुँज्याय् ब्वति मकायेत सभापति देउवा इनाप यानादिगु दु ।
सरकारं संवैधानिक परिषद्या मर्यादा व गरिमाया मदयेकेगु थुकिया कार्य क्षेत्रयात लिकुंकिगु याना तक्वः तक्क संघीय संसदयात ध्वँलाना अध्यादेश जारी याना संवैधानिक परिषद् (काम, कर्तव्य, अधिकार व कार्यविधि) सम्बन्धी ऐनयात संशोधन यायेगु अनुचित ज्या याःगु देउवाया द्वपं दु ।
