इजिप्टं फ्रान्सलिसे लडाकु विमान न्याइगु
चौलागा नवमी ११४१,बैसाख २२ बुधवाः
इजिप्टं फ्रान्स लिसे ३०गः राफेल लडाकू बिमान न्याइगु जूगु दु । थ्व नापं इजिप्टलिसे ५४गः राफेल लडाकू बिमान जुइ । अधिकारीतये कथं फ्रान्सेली वायुसेना लिपा राफेल दक्वःलय् दूगु देय् इजिप्ट जुइ ।
निगुलिं देशं राफेल बिमान खरिद सम्झौता जूगु घोषणा याःगु दु । इजिप्टया सेनां राफेल बिमान खरिदया नितिं फ्रान्सलिसे १० दँया ऋण काःगु न्ह्यथंगु दु । तर सम्झौता गुलि ध्यबाया जूगु खः धइगु इजिप्टया सेनां छुं उल्लेख याःगु मदु ।
इजिप्टं सन् २०१५ य् २४ गः राफेल लडाकू बिमान ५गू अर्ब ९३गू कोति डलरय् खरिद याःगु खः । फ्रान्सय् उत्पादित अत्याधुनिक थुगु राफेल बिमान खरिद याःगु न्हापांगु देय् नं इजिप्ट हे खः ।
तसकं अत्याधुनिक जूसा नं थुकिया विदेशय् मिइगु धाःसा उलि अप्वः जुइ फूगु मदुनि । इजिप्टं राफेल बिमान खरिद यायेन्ह्यः बजाः मालेगुलिइ दूगु फ्रान्सेली उत्पादक कम्पनी डासल्ट एभिएसनया थुपिं बिमान फ्रान्सेली वायुसेनां सन् २००६ निसें छ्यलाबुलाय् हयाच्वंगु खः । आः थुपिं विमान भारत व ग्रिस तकंया छुं देशय् मिइगु जुयाच्वंगु दु ।
फ्रान्सेली रक्षा मन्त्रालयं राफेल सम्झौतां फ्रान्सय् ३दँ तक्क ७द्वःम्हसिनं न्हूगु लजगा चूलाकिगु न्ह्यथंगु दु । नापं , थुकिं फ्रान्स व इजिप्ट दथुइ रणनीतिक व सैनिक साझेदारीयात थप सुदृढ याइगु मन्त्रालयया धापू दु ।
Categorized in अन्तर्राष्ट्रिय
