इंग्लीश प्रिमियर लिगय् लिभरपुल व आर्सनल अपूक त्यात, चेल्सी व म्यान्चेस्टर युनाईटेडया कासा ज्वलिन्ज्वःलय्
सिल्लागा द्वितीया ११४१, फागुन १७ सोमबाः
इंग्लीश प्रिमियर लिग फुटबलय् वंगु चान्हय् लिभरपुल, आर्सनल व टोटनह्याम हट्सपर त्यागु दु ।
शिर्ष क्लबत चेल्सी व म्यान्चेस्टर युनाईटेडं धाःसा गोल मयासें ज्वलिन्ज्वःलय् नुगः चिउगु दु ।
साविक त्याकुमि लिभरपुललं शेफिल्ड युनाईटेडयात उमिगु हे ख्यःलय् २–० या गोल अन्तरं बुकुबलय् आर्सनलं लेष्टर सिटीयात ३–१या गोल अन्तरं बुकल ।
अथेहे टोटनह्याम हट्सपरं बर्नलेयात ४–० या गोल अन्तरं बुकुबलय् चेल्सी व म्यान्चेस्टर युनाईटेडं गोल मयासें ज्वलिन्ज्वः म्हितुगु दु । वंगु चान्हय् लण्डन क्लबत क्रिष्टल प्यालेस व फुल्हमं नं गोल मजूगु कासा म्हितल ।
वंगु चान्हय्सिया कासालिपा इंग्लीश प्रिमियर लिगया ल्याः धलःखय् २६गू कासां ६२ गू ल्याः मुना म्यान्चेस्टर सिटी शिर्ष थासय् दु ।
उतिग्यंक कासापाखें ५०गू ल्याः मुना म्यान्चेस्टर युनाईटेड निगूगु थासय् दुसा ४९ गू ल्याः दूगु लेष्टर सिटी ३गूगु व ४५गू ल्याःया वेष्ट ह्याम युनाईटेड ४गूगु थासय् दु ।
५गूगु थाय्या चेल्सीया ४४गू ल्याः दुसा ४३ गू ल्याः नापं लिभरपुल ६गूगु थासय् थ्यंगु दु ।
Categorized in कासा
