इथियोपियाय् बन्दुकधारीया हताःलय् ३०म्ह सीत
चिल्लागा चर्तुर्थी, ११४१, चैत्र १९ गते विहीबाः
इथियोपियाय् बन्दुकधारीया हताःलय् ३०म्ह सीगु दु । इथियोपियाया दक्षिणी क्षेत्रय् दूगु ओरोमिया गाँमय् बन्दुकधारीं न्ह्योनेलाथें हताः याःबलय् मेपि आपालं घाःपाः जूृगु अन्तर्राष्ट्रिय समाचार संस्थातयेसं न्ह्यथंगु दु ।
इथियोपियाय् अप्वयावंगु जातिय हिंसाय् लाना सीपिनि ल्याः अप्वयावंगु दु । बन्दुकधारीं स्थानीय ई कथं सुथय् ९ ता इलय् गाँमय् दुहाँवना हताः याःगु प्रत्यक्षदर्शीयात उध्रित यासें अलजजिरां न्ह्यथंगु दु ।
सरकारी सुरक्षाकर्मीया उपस्थिति मदूगु थासय् गाँमय् च्वंपिन्त मुंका मंका कथं गोलीं कयेका स्यागु बुखँय् उल्लेख यानातःगु दु । तर उगु घटनाय् थःपिनि ल्हा मदूगु उगु पुचःलं प्रतिक्रिया बिउगु दु ।
इथियोपियाय् हिंसात्मक ज्यापहःलय् दुथ्यागु ओरोमो व अमहारा दक्वःलय् सक्रिय जातीय संगठन खः । सीमा क्षेत्रय् थःगु ज्यापहः सक्रिय याःगु उगु पुचःलं उगु हे क्षेत्रय् हिंसात्मक ज्यापहः केन्द्रीत याःगु दु ।
वंगु मार्चय् ओरोमो पुचःलं ३ सः सिवें आपा मिसा व मस्त स्यागु खः । हिंसात्मक ज्यापहः अप्वयावंसा समस्या ज्यंकेत कुतः मयाःगु धका अन्तर्राष्ट्रिय समुदायं अनया सरकारया कुँख्यंगु दु ।
इथियोपिया अफ्रिकाया आपालं जनसंख्या दूगु निगूगु देय् खः । इथियोपियाय् लिपांगु ई भूमि, शक्ति व स्रोतसाधान नियन्त्रणय् कायेत जातीय धेंधेंबल्ला न्ह्यानाच्वंगु दु ।
Categorized in अन्तर्राष्ट्रिय
