जैशीदेवल यूथ क्लब व जैसिदेवल तेक्वान्दो डोजाङ्गया ग्वसालय् न्हापांगु येँ जिल्लाव्यापी जुनियर आमन्त्रण मेयर कप तेक्वान्दो धेंधें बल्लाः कासा क्वचाःगु दु । उगु धेंधें बल्लाखय् येँया १४ थीथी दोजाङ्गं ब्वति काःगु खः ।

स्वन्हुयंकं जूगु कासाय् लिपांगु दिनय् जूगु फाइनल कासाय् न्हाप, ल्यू, लियांल्यू लाःपिं कासामिपिन्त येँ महानगरपालिकाया मेयर विद्यासुन्दर शाक्यं दसिपौ, मेडल, शिल्डलिसें तका सिरपाः लःल्हानादिल ।

ज्याझ्वलय् शाक्यंं व्यक्तित्व विकास याय्गु नितिं माःगु ग्वाहालि याय्गु बचं बियादिल । महानगरपालिकां हरेक क्षेत्रय् माःकथं फुकथं ग्वाहालि यानाच्वनागु धासें खेलकुद क्षेत्रया विकासय् नं माक्व ग्वहालि याय्गु प्रतिवद्धता प्वंकादिल ।

जैसीदेवल युथ क्लबया नायः राजेश प्रजापतिया सभापतित्वय् जूगु ज्याझ्वलय् क्लबया महासचिव चन्द्रगोपाल प्रधानं लसकुस न्वचु तयादीगु खः ।

२१ वडाया वडाध्यक्ष उदय चुडामणि बज्राचार्य, क्लबया सल्लाहकार मधुसुदन प्रधान, प्रकाश खड्गी लिसें नं कासामिपिन्सं समाजय् विकासय् नं योगदान बीमाःगु खँय् बः बियादीगु खः ।

ज्याझ्वलय् नेपाल तेक्वान्दो महासंघया महासचिव दिपराज गुरुङ, रिलायन्स फाइनान्सया प्रमुख कार्यकारी अधिकृत अनिल श्रेष्ठ, नेपाल तेक्वान्दो संघ वागमती प्रदेशया सचिव उमेश नकर्मी लिसेंया उपस्थिती दुगु खः ।

धेंधें बल्लाखय् त्याःपिं पुरस्कृत

३८–४१ केजीइ सदिक्षा कार्की (विज्येश्वरी तेक्वान्दो डोजाङ्ग), दिया रजक (लैनचौर तेक्वान्दो डोजाङ्ग), मेलिना राई (मूलपानी तेक्वान्दो डोजाङ्ग) व सजिना तामाङ्ग (ढल्को तेक्वान्दो डोजाङ्ग) छसिकथं न्हाप, ल्यू, लियांल्यू व हःपाः लाःगु दु ।

अथे हे, ४६–५० केजी (मिजं) पाखे सरोज मगर (दिलीप स्मृति तेक्वान्दो डोजाङ्ग) न्हाप, निश्चल मगर (कोटेश्वर तेक्वान्दो डोजाङ्ग) ल्यू, विपिन सजवाल (श्रृजना तेक्वान्दो डोजाङ्ग) लियांल्यू व हेमन्त पाठक (जैसीदेवल तेक्वान्दो डोजाङ्ग) हःपाः जूगु खः ।

व हे कथं ४६–५० केजी ग्यसु पुचलय् हे मिसापाखे ईशिका राणा (कोटेश्वर तेक्वान्दो डोजाङ्ग), सुमिना खड्गी (लैनचौर तेक्वान्दो डोजाङ्ग), ललिता बुढा मगर (स्यूचाटार तेक्वान्दो डोजाङ्ग) व प्रशंग लामा (ढल्को तेक्वान्दो डोजाङ्ग) न्हाप, ल्यू, लियांल्यू व हःपाः सिरपाः त्याकेत ताःलात ।

अथे हे सर्वोत्कृष्ट कोच राजेन्द्र खत्री, सर्वोत्कृष्ट रेफ्री भास्कर श्रेष्ठ, सर्वोत्कृष्ट पुम्से पर्फमर आयूष ढुङ्गेल, बेस्ट फाइटर (मिजं) सागर सिहं व बेस्ट फाइटर (मिसा) एलिना श्रेष्ठ जुइत ताःलाःगु खः ।

वय्कःपिन्त नं दसिपौ लिसें तका सिरपाः लःल्हाःगु खः ।

त्याकामिपिन्त ब्यूगु नगद सिरपाः जैशीदेवल यूथ क्लबया पुलांम्ह कार्यकारिणी सदस्य थौंकन्हय् अमेरिकाय् च्वंच्वनादीम्ह तेक्वान्दो ग्रान्ड मास्टर शुद्धोदन मान रंजितं ग्वाहालि यानादीगु खः ।

फाेटाे ः उमेश मानन्धर

Categorized in कासा