नेपाल आदिबासी जनजाति पत्रकार महासंघ (फोनिज) या भेला नाप न्ह्यक्वःगु पूर्ण बैठक क्वचाःगु दु।

वंगु पुस २५ व २६ गते कैलालीया भादा गाउँ होमस्टेय् उगु मुज्याँ क्वचाःगु खः। बैठकं १७ बुँदे घोषणापत्र न जारी याःगु दु। उगु मुज्यां पहिचानया आन्दोलनय् सामाचार संकलनया लागि स्थलगत खटे जुया ज्यायापि आदिवासी जनजाति पत्रकारतय्त सुरक्षाकर्मी नाप प्रशासनं म्वाय्क म्वाय्कं ज्वनिइगु व दुःख बिइगु यानाच्वंगुलि भत्र्सना न याःगु दु।

पत्रकार तयेगु पेशागत नाप भौतिक सुरक्षायात सुनिश्चित्ता यायेत न सरकारनाप फोनिजं माग याःगु दु। अथेहे थारु समुदायया स्थानीय शासनया कथं दुगु बरघर प्रथायात सरकारं आःतक कानुनी मान्यता मबिउगु विषययात फोनिजं खँ ल्ह्वंगु दु। बैठकं थारु प्रथा परम्परा व संस्कारजन्य मान्यतायात कानुनी हैसियत लःल्हाना थारु तयेगु ऐतिहासिक परम्परायात निरन्तरता बिइत सरकारयात माग याःगु दु। थारु नापं आदिवासी जनजाति समुदायपि दुगु ऐतिहासिक देउथानया संरक्षण लिसे प्रवद्र्धन यायेगु निति राज्यं लगानी याये माःगु माग याःगु दु। अथेहे, श्रमजीवि पत्रकार ऐन जारी जूगु निगु दशक स्वया अप्पो जुइगु धुकुगु दुसा उकियात पूर्ण कार्यान्वयन मजुगु खँ ल्ह्वंगु दु

देयन्यकं च्वपि श्रमजीवि पत्रकार तयेगु ऐनया पूर्ण कार्यान्वयनया माग याःगु दु। मुज्याँ पत्रकार सम्बद्ध संघ संस्थायात बियावयाच्वंगु सरकारी सहुलियत अनुदान रकम म्हो जुगु धका धासे उकियात ई कथं अप्पोकेगु न माग याःगु दु। नापं आदिबासी पत्रकार सम्बद्ध संघ संस्थायात उगु अनुदानपाखे बञ्चित यानाच्वंगु दु धका सरकारया ध्यानाकर्षण न याःगु दु।

अथेहे आदिवासी जनजाति पत्रकार तय्स न्ह्याकाच्वंगु मातृभाषा व मेमेगु भाषाया सञ्चारमाध्यमयात स्तर थकायेत लगानी यायेत न उगु भेलां सरकारनाप माग याःगु दु। नापं सञ्चारमाध्यम समानुपाति समावेशी सिद्धान्तया आधारय् सञ्चालन जुइमफुगु धका धासे बैठकं सरकार नाप निजी स्तरपाखे सञ्चालन यानाच्वंगु सञ्चारमाध्यमया दक्को संरचनाय् समानुपातिक समावेशी ख्वाः वइगु कथं जनशक्ति व्यवस्थापन यायेत व समाचारया विषयवस्तु तक दक्को समुदायया विविधताया किपा वइगु कथं समाचार सामग्री सम्प्रेषण नाप प्रकाशन यायेत माग याःगु दु।

आदिवासी जनजाति तयेगु नखः नेपाल सरकारं आःतक सार्वजनिक विदा बिइत कन्जुस्याइ याना वयाच्वंगु दु धका धासे मुज्याँ आदिवासीतयेगु महत्वपूर्ण नखः जुइगु इलय् सार्वजनिक विदा बिइत सरकारयाके माग याःगु दु। अथेहे, आमसञ्चारमाध्यमयात नियमन, व्यवस्थित यासे प्रदेश सरकारलगायत दयकाच्वंगु मिडिया काउन्सिल विधेयक निर्माण प्रक्रियायात समानुपातिक समावेशी कथं हयेत माग याःगु दु। सुदूरपश्चिम प्रदेशया कैलाली व कञ्चनपुर जिल्लाय् च्वंगु पर्यटकीय ऐतिहासिक थाय् बेहराबाबा, घोरीघोरा, डुबरी ताल, कोइलहुवा ताल, जाखौर ताल, जोगिनिया ताल, इटाहा क्षेत्रलगायत थाय्या संरक्षण लिसे प्रवद्र्धन यायेत सरकारयाके माग याःगु दु।

अथेहे, आदिवासी जनजातिया मौलिक ज्यानापं सम्बन्धित वस्तुकला, हस्तकला, गीतबास, ज्ञान व सस्कार नापं संस्कृतियात व्यवसायीकरण, स्थानीय उत्पादन (महुवा, कोदो, केरा, जाकि, स्याउ आदि) पेय पदार्थया स्तरीकरणया लागि कानुनी मान्यता प्रदानयात सरकारयात इनाप याःगु दु।

Categorized in राष्ट्रिय