माओवादी केन्द्र त्वःतुपिं प्यम्ह मन्त्रीपिनिगु सांसद पदपाखें पदमुक्त
चिल्लागा द्वादशी ११४१, चैत्र २६ गते, विहीबाः
नेकपा माओवादी केन्द्र त्वःता नेकपा एमाले प्रवेश याःपिं प्यम्ह मन्त्रीपिनिगु सांसद पदपाखें पदमुक्त जूगु दु ।
प्रतिनिधिसभाया थौं च्वंगु मुँज्याय् सभामुख अग्निप्रसाद सापकोटां नेकपा माओवादी केन्द्रं कारबाही याःगु प्यम्ह सांसद पदमुक्त जूगु जानकारी बियादिल ।
माओवादी केन्द्रया संसदीय दलया नेता पुष्पकमल दाहाल प्रचण्डं सोमबाः संसद सचिवालययात छगु पौ छ्वया एमाले प्रवेश याःपिं अर्घाखाँचीया टोपबहादुर रायमाझी, कैलाली–४ या लेखराज भट्ट, रौतहट–३ या प्रभु साह व कैलाली–३ या गौरीशंकर चौधरीं पार्टी परित्याग याःगु जानकारी यानादिगु खः ।
राजनीतिक दलसम्बन्धी ऐनकथं दल परित्याग याःपिं सांसद पदमुक्त जुइ । प्यम्हं सांसद मन्त्री जुयादी संविधानकथं प्रतिनिधिसभा सदस्य मजुइवं मन्त्री पद खाली जुई ।
वय्कपिं पदय् च्वनाच्वनेत हाकनं मन्त्री नियुक्ती यायेमाःगु कानूनी व्यवस्था दु ।
Categorized in राजनीति
