विश्वकप छनौट फुटबल कासाय् फ्रान्स व युक्रेन दथुइ ज्वंलिंज्व
चिल्लाथ्व एकादशी, ११४१, चैत्र १२ विहीबाः
विश्व विजेता फ्रान्सं विश्वकप छनौट चरणया सुरुवात ज्वलिन्ज्वः याःगु दु । युरोपेली क्षेत्रया छनौट अन्तर्गत वंगु चान्हय् जूगु थःगु न्हापांगु कासाय् फ्रान्स युक्रेनलिसे १गू–१गूया ज्वलिन्ज्वःलय् दिउगु खः ।
घरेलु ख्यःलय् जूगु कासाय् फ्रान्सया नितिं १९गूगु मिनेटय् एन्टोनी ग्रिजम्यानं गोल याना सुरुवाति अग्रता बिउगु खः । तर ५७ गूगु मिनेटय् फ्रान्सया प्रेसनल किम्पेम्बें आत्मघाती गोल यायेधुंका युक्रेन ज्वलिन्ज्वःया अवस्थाय् थ्यंगु खः । अनलिं थप गोल जुइ मफुत व फ्रान्स ज्वलिन्ज्वःलय् दित ।
पुचः डी अन्तर्गत हे जूगु मेगु कासाय् फिनल्याण्ड व बोसनिया हर्जगोविनां २गू–२गू गोलया ज्वलिन्ज्वः म्हित ल्याः इउँगु दु । थुखे युरोपियन छनोटया मेगु कासाय् धाःसा बेल्जियमं वेल्सयात बुकुगु दु । घरेलु मैदानय् वंगु चान्हय् जुगु कासाय् बेल्जियमं वेल्सयात ३गू–१गूया गोल अन्तरं बुकुगु खः । बेल्जियम त्यागुलिइ केभिन डि ब्रुयन, थोर्गन हाजार्ड व रोमेलु लुकाकुं गोल याःगु खः ।
वेल्सया ह्यारी विल्सनं छगू गोल याःगु खः । थुगु पुचःया मेगु कासाय् चेक रिपब्लिकं इस्टोनियायात ६गू–२गूया गोल अन्तरं बुकुगु दु । युरोपया मेगु बल्लागु टोली नेदरल्याण्ड्सयात टर्कीं ४गू–२गू या गोल अन्तरं बुकुगु दु ।
टर्कीया नितिं बुराक यील्माजं ह्याट्रिक गोल याःगु खः । थुखे पोर्चुगलं अजरबैजानयात १–०या गोल अन्तरं बुकल । वंगु चान्हय् हे सर्वियां रिपब्लीक अफ आयरल्याण्डयात ३–२गूया गोल अन्तरं बुकुबलय् रुसं माल्टायात ३गू–१गूया गोल अन्तरं व मोन्टेनेग्राें लात्भियायात २–१गूया गोल अन्तरं बुकुगु दु ।
Categorized in कासा
