नेपालभाषाया महाकवि गिरिजाप्रसाद जोशीया ८३ क्वःगु बुदिंया लसताय् नेपाल प्रज्ञा–प्रतिष्ठानं ग्वसालय् महाकविया ब्यक्तित्व व कृतित्वया थीथी आयाम विषयक विचार गोष्ठी जुगु दु।

उगु ज्याझ्वलय् साहित्यकार शरद कसाः नं छगु ज्यापौ न्ह्यब्वयादीगु खः । वयकलं न्ह्योब्वगु ज्यापौलय् महाकवि जोशी नेपालभाषा मांभाय् सम्वद्र्धन व उन्नतिया निंतिं हरेक इलय् वयकः चिन्तित व सचेत दुम्ह खः धका धयादीगु दु । कसाःजुं न्ह्याब्वयादीगु ज्यापौयात कयाः समालोचक पूर्ण ताम्राकारं टिप्पणी यानादीसे महाकवि जोशी नेपालभाषां दकलय् अप्वः सफू च्वःम्ह व्यक्तित्वया रुपय् खनेदु धकाः धयादीगु दु ।

प्रज्ञा प्रतिष्ठानया उपकुलपति जगमान गुरुङया सभापतित्वय् न्ह्याःगु उगु ज्याझ्वलय्  मूपाहां कुलपति गंगाप्रसाद उप्रेती जुयादीगु खः। मिसा उपन्यासकार शशीकला मानन्धरं न्ह्याकादीगु उगु ज्याझ्वललय् महाकवि जोशीजुं च्वयादीगु चिनाखँ साहित्यकार रमेशकाजी स्थापित, रजनी मिला, साहित्यकार नारद बज्राचार्य, कृष्णभक्त बोडेपिन्सं नं पाठ यायगु ज्या यानादीगु दु ।

उगु ज्याझ्वलय् सचारकःमि सुरजवीर बज्राचार्यं महाकवि जोशीया ‘भगवानं स्यन’ कविता वाचन नं यानादीगु खः । प्रतिष्ठानया मातृभाषा विभागया प्रमुख प्राज्ञ लक्ष्मी मालीया संयोजनय् जूगु खःसा मूपाहां उप्रेतीं महाकवि जोशीया खण्डकाव्य ‘हेल्चा’या विमोचन नं यानादीगु खः । वयकः ४९ दँया वैशय् हे मदुम्ह खःसा जनजागरण सम्बन्धी कविता लिसें उपन्यास, म्ये, बाखं, नाटक लिसें थीथी बिधाय् थःगु च्वसा न्ह्याका नेपालभाषा साहित्य ख्यःयात तव्याः यानादीगु खः ।

Categorized in राष्ट्रिय