भारतया उत्तराखण्डय् हिमताल तज्यात
लहानान्युज | चौलाथ्व द्धादशी ११४१,बैसाख ११ सनिवाः
भारतया उत्तराखण्डय् हाकनं हिमताल तज्याःगु दु । भारत–चीन सीमा क्षेत्र लिक्क लाःगु नेती उपत्यकाया चमोलीया जोशीमठ धइगु थासय् म्हिगः हिमताल तज्याःगु भारतीय सञ्चारमाध्यमतय्सं न्ह्यथंगु दु ।
उगु क्षेत्रय् सञ्चार स्वापू त्वाःदःगुलिं पूवंक जानकारी कायेत थाकुयाच्वंगु उत्तराखण्ड प्रहरीं न्ह्यथंगु दु । प्रहरी अधिकारीतय्सं थौं सनिलय्तक्कय् पूवंक विवरण वयेफुगु धाःगु दु । उगु क्षेत्रय् आवादी म्ह्वः दुगुलिं यक्व क्षति मजूगु धुकुमां याःगु दु ।
बोर्डर रोड अर्गनाइजेसनया कमाण्डर कर्णेल मनिष कपिलं थुगु क्षेत्रय् भारतं सडक दयेकेज्या न्ह्याकातःगु व उगु क्षेत्रय् आःतक्क सुं नं हताहत मजूगु धयादीगु भारतीय सञ्चारमाध्यमतय्सं न्ह्यथंगु दु ।
जोशीमठ–मलारी सडकखण्ड धाःसा च्वापुं त्वपूगु दु । अय्जुयाः सुं मनूत तक्यनाच्वंगु जुइफुगु धुकुमां अधिकारीतय्सं याःगु दु । उत्तराखण्डया मुख्यमन्त्री तिरथ सिंह रावतं हिमताल तज्याःगु सुचं वःगुलिं सतर्क जुयाच्वनेत सुचं जारी यानादीगु दु ।
छुं अप्रिय घटना मजुइमा धकाः छुं परियोजनाय् चान्हसिया इलय् ज्या मयायेत निर्देशन नं बियागु वय्कलं जानकारी बियादिल । थ्वयां न्ह्यः उत्तराखण्डय् हे हिमताल तज्यानाः अलनन्दा खुसिइ वःगु खुसिबालय् लानाः ५० सीगु खःसा छुं बेपत्ता जुयाच्वंगु दनि । थुगु घटनाय् छुं नेपाली मजदुरत नं लाःगु दु ।
भारतय् दुगु १० द्वः स्वयां आपाः हिमतालमध्ये उत्तराखण्डय् जक करिब १५ सः हिमताल दुगु धाःगु दु ।
Categorized in अन्तर्राष्ट्रिय
