गोपाल कृष्ण महर्जनं हालादीगु म्ये ‘अय्लाः अय्लाः’ या म्यूजिक भिडियो सार्वजनिक जूगु दु । शनिबाः येँ सुन्धारास्थित सिटिसि मलय् दुगु सिडिसि सिनेमाय् उगु म्यूजिक भिडियो प्रिमियर याःगु खः ।

म्ये स्वयेधुंकाः दर्शकतय् प्रतिक्रियां थः तसकं हे उत्साहित जुयागु म्यूजिक भिडियोया निर्देशक सुरेन्द्र तुलाधरं धयादिल ।

‘बांलाःगु लिच्वः बी फयेमा धकाः मेहेनत यानागु खः । दर्शकतय् प्रतिक्रिया न्यनाबलय् मेहेनत सफल जूगु ताल’ निर्देशक तुलाधरं धयादिल ।

बांलाःगु म्यूजिक भिडियो दयेकेगु नितिं बजेटय् छुं नं कथं सम्झौता मयानागु म्येहालामि महर्जनं धयादिल ।

‘नेवाः म्ये धायेवं कम धेबा खर्च यानाः दयेकेमाः धयागु ला मदुनि । दयेकुसेंलि बांलाक हे दयेके धकाः बजेटय् छुं नं कथं सम्झौता मयाना’ निर्माता तकं खःम्ह म्येहालामि महर्जनं धयादिल ।

सृष्टि महर्जनलिसें नांजाःम्ह अभिनेता पल शाहं अभिनय यानातःगु म्यूजिक भिडियोया छायाङ्कन किपूस्थित ससःत्वाः, थँबहिस्थित 10X व टेकुस्थित बम्बीर शिवालय ट्रस्टय् यानातःगु दु ।

म्येया परिकल्पनाकार नं निर्देशक तुलाधर हे खः । कोरीयोग्राफी रोहिया महर्जनं यानादीगु दु ।

सौरभ लामाया डिओपीइ इश्वर लाल सिंकेमनां छायाङ्कन यानादीगु दु । दृश्य सम्पादन सुजन बडालं यानादीगु दु ।

म्येग्वः पवन जोशीं च्वयादीगु खःसा अनिल तुलाधरं लसय् हनादीगु दु ।

सिडिसि सिनेमाय् प्रिमियर जुयाकथं थुगु म्यूजिक भिििडयो ओएसआर डिजिटल युट्युबमार्फत विश्वब्यापी सार्वजनिक जुइधुंकूगु दु ।