न्हूदँ २०७८ या लसताय् भिन्तुना
लहनान्युज | चौलाथ्व द्धितीया ११४१,बैसाख १ बुधवाः
न्हूदँ २०७८ थौंनिसें न्ह्याःगु दु । थौं देय्न्यंक थीथी ज्याझ्वः यानाः विक्रम संवत् २०७७ यात बिदा बियाः २०७८ यात लसकुस यानाच्वंगु दु ।
न्हूदँया हे झ्वलय् राष्ट्रपति विद्यादेवी भण्डारीं स्वदेश अले विदेशय् दुपिं नेपाःमिपिन्त सुख, शान्ति, समृद्धि, व आरोग्यया लागिं भिंतुना देछाना दीगु दु ।
भिंतुना हसनाय् राष्ट्रपति भण्डारीं वंगु दिंया समीक्षा यायेगु अले वइगु दिंया ख्वाःपाः स्वयेगु ह्वःताःया रुपं लसकुस यासें न्ह्याःवनेत अपील यानादीगु दु ।
थ्वयहे दथुई प्रधानमन्त्री केपी शर्मा ओलीं कोरोना नियन्त्रणया थीथी कुतः न्ह्यानाच्वंगुलिं याकनं हे लकडाउन यायेगु योजना मदुगु धयादीगु दु ।
न्हू दँ २०७८ या सन्दर्भय् भिंतुना हसना ब्युसें प्रधानमन्त्री ओलीं सरकारं जारी याःगु सुरक्षाया मापदण्ड पालना यानाः नागरिक थः हे सुरक्षित च्वंसा कोरोना नियन्त्रणया लागिं सरकारं ल्ह्वंगु पलाः फलदायी जुइगु धयादिल ।
वय्कलं हलिंया गुलिखे देय् लकडाउनय् थ्यनेधुंकूसां सरकारं सतर्कता विधियात हे न्ह्यःने हयागु धयादिल । परिस्थिति स्यन धाःसा अन थ्यनेमाःगु जूसां आः हे बिचाः मदुगु धासें प्रधानमन्त्री ओलीं सावधानी नालेत सकसितं अपिल नं यानादिल । वय्कलं गुलिसिनं लकडाउनया ख्याच्वः ब्यूगु धासें थः व पक्षय् मदुगु जिकिर यानादिल ।
वय्कलं सरकारं विकास निर्माणया ज्यायात उच्च प्राथमिकताय् तःगुलिं निराशा थनेत याःगु कुतःत मान्य मजुइगु तर्क यानादिल । वय्कलं ताः इलंनिसें पियाच्वंगु मेलम्ची येँय् हयागु धासें देय्न्यंक विकास निर्माणया ज्यां तीव्रता काःगु धयादिल ।
मेगु प्रसंगय् प्रधानमन्त्री ओलीं विदेशय् असुरक्षा जूगुलिं देशय् दुने पाय्छि लजगाःया ह्वःताः मालेत इनाप यानादिल । वय्कलं ल्याय्म्हतय् दक्षता व सीप देय्या विकासय् छ्यलेत नं इनाप यानादिल ।
Categorized in राष्ट्रिय
