स्वास्थ्य तथा जनसंख्या मन्त्रालयं यात ब्वनेकू मवनेत अपिल
लहनान्युज | चौलाथ्व चौथी ११४१,बैसाख ३ शुक्रवाः
स्वास्थ्य तथा जनसंख्या मन्त्रालयं स्वनिगःनाप १४गु जिल्लाया विद्यार्थीतय्त ब्वनेकू मवनेत अपिल याःगु दु । आःतक सेवा बन्द यायेगु विषयलय् सरकारं औपचारिक निर्णय मयाःनीगु जूसां स्वास्थ्य मन्त्रालयं संक्रमणया जोखिम अप्वःगुलिं ब्वनेकू मवनेत सचेत याकूगु खः ।
मन्त्रालयया स्वास्थ्य आपत्कालीन तथा विपद व्यवस्थापन इकाई अले आपत्कालीन सञ्चालन केन्द्रं विहिवाः विज्ञप्ति पिथनाः अति प्रभावित १४गु जिल्लाय् उप्वः भीडभाड जुइगु फुक्क कथंया ज्यापहः अले सेवा बन्द यायेत धागु दु ।
स्वनिगःया येँ, ख्वप व यल, स्वनिगलं पिनेया कास्की, रुपन्देही, चितवन, बाँके, पर्सा, कैलाली, मोरङ, दाङ, सुर्खेत, बारा व बाग्लुङ जिल्लाया हकय् थन्यागु अपिल याःगु दु । निजी विद्यालय संचालकया दबाबय् सरकारं ब्वनेकू बन्द यायेमफयाच्वंगु ईलय् स्वास्थ्य मन्त्रालयं मस्तय्त ब्वनेकू मछ्वयेत इनाप याःगु खः ।
उल्लेखित १४गु जिल्लाय् ब्वनेकू, रात्री व्यवसाय, ७ताःईलिपा फुक्क कथंया रेष्टुराँ व क्लब, खेलकुद, जीम, पूजाआजा व जात्रा, सभा सम्मेलन मयायेत धागु दु । अथेहे सिनेमा हल, सपिङ मल, नाचघर, पार्टी प्यालेस, हेल्थ क्लब, स्विमिङ पुलय् मवनेत न धागु दु ।
म्हिगः नेपालय् लिपांगु २४घौदुने ५सः व ३४म्हेसिके कोरोना संक्रमण पुष्टि जूगु दु । ३ हजार ५ सय ८८म्हसिके पीसीआर व ५ सय ६४सित एन्टिजिन परीक्षण याःगुलिइ १२ दशमलव ८६ प्रतिशत मनूतय्के संक्रमण जूगु स्वास्थ्य तथा जनसंख्या मन्त्रालयं धागु दु ।
मन्त्रालयं पिथंगु धलःकथं म्हिगः थप जूपिं संक्रमितत स्वनिगःया १ सय ९६म्ह दु । उकिइ मध्ये येँय् १ सय ४५म्ह, यलय् ४३ व ख्वपय् ८म्ह दु । थ्वनाप नेपालय् आःतक कोरोना संक्रमितया ल्या २गु लख ८२ हजार ५४म्ह थ्यंगु दु ।
लिपांगु २४घौदुने थप ५म्ह मनूत कोरोनाया हुनिं मन्त । थ्वनाप नेपालय् संक्रमणया हुनिं मदुपिनिगु ल्या ३ हजार ६६म्ह थ्यन । अथेहे थप १ सय ५७म्ह संक्रमणमुक्त जूगु दु । थ्वनाप देय्न्यंकं संक्रमणमुक्त जूपिनिगु ल्या २ लाख ७४ हजार ६ सय ४०म्ह थ्यंगु दु । देय्न्यंकं सक्रिय संक्रमितया ल्या ४ हजार ३ सय ८४म्ह दु ।
अथेहे स्वास्थ्य मन्त्रालयं सरकारी अस्पतालयात म्ह्वोतीं ५० प्रतिशत बेड कोभिड–१९ या संक्रमितया नितिं छुटे यानातयेत अले निःशुल्क उपचार सेवा बीत निर्देशन ब्यूगु दु ।
