राष्ट्रकवि घिमिरे व शताब्दी पुरुष जोशीया हुलाक टिकट पिदन, ‘डा.’ उपाधियात कया कुँख्यना
राम डंगोल | पोहेलागा पारु ११४१, माघ १६ शुक्रवाः
सरकारं निम्ह राष्ट्रिय व्यक्तित्वया किपाः दूगु हुलाक टिकट पिकाःगु दु । माघ ११ गते च्वंगु मन्त्रिपरिषद्या मूँज्यां राष्ट्रकवि स्वर्गीय माधवप्रसाद घिमिरे व शताब्दी पुरुष सत्यमोहन जोशीया किपाः दूगु हुलाक टिकट पिकाना छ्याबुलाय् हःगु खः । तर वय्कपिनिगु सम्मान स्वरुप नां न्ह्यने ‘डा.’ उपाधि तना लिकाःगु निर्णयं वय्कपिनिगु सम्मानसिबें अपमान जूगु धकाः कुँख्यना अप्वःगु दु ।
मानार्थ विद्यावारिधि गुगुनं क्षेत्रय् विशेष योगदानया लिधंसाय बिइगु उपाधि खः ।
थुकि उपाधि काइम्हसिबे बिइम्हेसियागू भूमिका अप्वः दई । स्व. घिमिरे व जोशी निम्ह मानार्थ विद्यावारिधि कयादिइपिं खः । स्व. घिमिरें नेपाली साहित्य लिसें दक्वः क्षेत्रय् याःगु योगदानया मूल्याङ्कन यासें २०७२ सालय् त्रिभुवन विश्वविद्यालयं महाविद्यावारिधि उपाधिपाखें छाय्पियादिइगु खः ।
अथेहे २०६८ सालय् काठमाडौं विश्वविद्यालयं संस्कृतविद् लिसें च्वमि सत्यमोहन जोशीयात सम्मानार्थ महाविद्यावारिधिं छाय्पियादिइगु खः ।
थ्वः घोषणा लिपाः सामाजिक सञ्जालय् मानार्थ विद्यावारिधियात नांया न्ह्यने छुनां जोशी व घिमिरेया अपमान जूगु धासें कुँखिना अप्वःगु दु ।
