बेलायतं तल भारतयात रेड लिष्टय्
चौलाथ्व अष्टमी, ११४१, वैशाख ७ मंगलबाः
बेलायतं कोरोना संक्रमण तच्वःगु गतिइ दुगु भारतयात रेड लिष्टय् तयाः भारतीय नागरिकयात बेलायत प्रवेशय् रोक तःगु दु ।
बेलायती नागरिकया हकय् भारतं बेलायत लिहांवःपिं नागरिकत धाःसा अनिवार्य १० न्हु क्वारेन्टिनय् च्वनेमाःगु नियम लागु याःगु दु । बेलायतया स्वास्थ्यमन्त्री मैट हैकाकं भारतं बेलायत प्रवेश याःपिंमध्ये सच्छि व ३ म्हेसिके कोरानाया न्हूगु भेरिएन्ट पुष्टी जूगु धासें थज्याःगु नियम लागु जूगु जानकारी बियादिल ।
भारतं बेलायत दुहांवःपिं नागरिकतय्के खनेदुगु कोरोनााय न्हूगु भेरिएन्टबारे बेलायती वैज्ञानिकतय्सं अनुसन्धान न्ह्याकूगु दु । थ्व हे दथुइ, बेलायती प्रधानमन्त्री बोरिस जोन्सनया भारत भ्रमण कोरोनाया हुनिं स्थगीत जूगु दु ।
बेलायतय् आः १ लख २७ द्वः २ सः स्वयां आपाः सीधुंकल । अन कोरोना संक्रमितया ल्याः ४३ लख ९० द्वः ७ सः स्वयां आपाः दु ।
Categorized in अन्तर्राष्ट्रिय
