न्हापांगु छगू दिवसिय क्रिकेटय् भारत विजयी
चिल्लाथ्व दशमी, ११४१, चैत्र ११ बुधबाः
इंग्ल्यान्डविरुद्धया न्हापांगु एकदिवसीय क्रिकेट कासाय् भारत त्याःगु दु । भारतया पुनेय् म्हिगः जूगु कासाय् घरेलु टोली भारत ६६ रनं त्यात । कासा त्याःगुलिसें भारतं ३ कासाया श्रृंखलाय् १–० या अग्रता काःगु दु ।
भारतं ब्यूगु ३सः व १८ रनया आज्जुलिसें जवाफी ब्याटिङ याःगु खः । इंग्ल्यान्डं ४२ ओभर १ बलय् अलआउट जुयाः २सः व ५१ रन जक दयेकेत फत । उकिया लागिं जोनी बेयस्र्टों ९४ रन अले जेसन रोयं ४६ रन दयेकूसां टोलीयात त्याकाबी मफुत ।
बलिङपाखे भारतया डेब्यु कासामि प्रशिद्ध कृष्णं ४ विकेट काल । सार्दुल ठाकुरं ३ विकेट काःबलय् भुवनेश्वर कुमारया नामय् २ विकेट च्वन । थ्वयां न्ह्यः न्हापां ब्याटिङ याःगु भारतं ५० ओभरय् ५ विकेट तंकाः ३सः व १७ रन दयेकूगु खः । भारतया शिखर धवनं ९८ रन दयेकूबलय् के.एल राहुल ६२ रनय् अविजित जुल ।
इंग्ल्यान्डया बेन स्टोक्सं ३ अले मार्क उडं २ विकेट काल । भारत व इंग्ल्याण्ड दथुइया निगूगु एक दिवसिय कासा शुक्रबाः पुनेय् हे जुइ ।
