भारतय् आन्दोलनकारीपिन्त लक्षित यानाः इन्टरनेट सेवा बन्द
राम डंगोल | पोहेलागा तृतीया ११४१, माघ १८ आइतवाः
भारतया राजधानी दिल्लीइ आन्दोलन यानावःपिं किसानतय्गु हुनिं तनाव जूगु दु । थ्वहेदथुइ आन्दोलनकारीपिन्त लक्षित यानाः इन्टरनेट सेवा बन्द यानाब्यूगु दु ।
दिल्लीइ किसानतय्गु पकड दुगु मू स्वंगु थासय् सरकारं मोबाइल व इन्टरनेट सेवा बन्द यानाब्यूगु खः । आमसुरक्षा बःलाकेत इन्टरनेट सेवा बन्द याःगु अले थ्व थासय् मध्य चान्हय् तक सेवा बन्द जुइगु धागु दु ।
आः न दिल्लीया सिङ्घु, गाजीपुर व टिक्री जिल्लाय् मोबाइल इन्टरनेट सेवा बन्द जुयाच्वंगु दु । दिल्लीइ द्वलंद्व किसानतय्सं लांलांनिसें आन्दोलन यानावःगु दु ।
सरकारं आः तिनि सार्वजनिक याःगु कृषि कानुन लित कायेत उमिसं माग याःगु दु ।
विदेशी तःधंपिं लगानीकर्तापिन्त आकर्षित याइकथं सरकारं हःगु कानुनं पुस्तौनिसें परम्परागत कृषि पेशा यानावःपिन्त विस्थापित याइगु इमिगु धापू दु ।
थ्व कानुनं भारतया करोडौं किसानत विस्थापित जुइगु इमिसं तर्क याःगु दु ।
