भारतय् अक्जिन हाहाकार जुल
चौलाथ्व एकादशी ११४१,बैसाख १० शुक्रवाः
कोरोना संक्रमितया ल्या अप्वःगुनाप भारतया न्हू दिल्लीस्थित अस्पतालत बिरामीतय्त सेवा बिइमफइगु अवस्थाय् थ्यनीगु ग्याचिकू ब्वलंगु दु ।
दिल्लीया ६गू अस्पतालय् संक्रमितपिन्त वासः याकेत मजिमगाःगु अक्सिजन फूगु धागु दु । मनूत अक्सिजन कायेमखनाः समस्याय् लाःगु दु । थुखय् चिकित्सकपिन्सं मेमेगु अस्पतालय् अक्सिजन ल्यंदनीगु धयाच्वंसां वास्तवय् अक्सिजनया मौज्दात फूगु दु ।
न्हू दिल्लीया अस्पतालय् आः न थ्यंमथ्यं फुक्कं धइथें बेडत बिरामीया चापया हुनिं जाःगु दु । भारतय् म्हिगः कोरोना संक्रमित सीगु ल्या अप्वगुनाप न्हूगु विश्व रेकर्ड दयेकूगु दु । भारतय् छगू राज्यं मेगु राज्यय् अक्सिजन यंके मदइगु नियम दयेकूगुनाप बिरामीतय्गु अवस्था झं नाजुक जूगु दु ।
दिल्लीनापया मेमेगु राज्यं अक्सिजन आपूर्ति यायेत माग यानावःगु दु । छगू राज्यं मेगु राज्यय् अक्सिजन यंकेमबीगु केन्द्र सरकारया नियम पाय्छि मजू धकाः थीथी राज्यया मुख्यमन्त्रीपिन्सं धयाच्वंगु दु । अथेजुयाः इमिसं अक्सिजनया सहल आपूर्ति याकेत माग याःगु खः ।
थ्वहेदथुइ भारतीय प्रधानमन्त्री नरेन्द्र मोदीं पश्चिम बंगालय् थौंया नितिं क्वःज्यूगु चुनावी ¥यालीइ ब्वति मकायेगु धयादीधुंकूगु दु । वय्कलं म्हिगः सनिलय् ट्वीट यानाः थः पश्चिम बंगाल मवनेगु धयादीगु खः ।
प्रधानमन्त्री मोदीं थौं हे कोभिड–१९ उच्चस्तरीय मुँज्या यायेगु न धयादीगु दु । प्रधानमन्त्री मोदीं ब्वति मकाइगु जुइवं पश्चिम बंगालया मुख्यमन्त्री ममता बनर्जीं न थःगु चुनावी ज्याझ्वःत रद्द यानादीगु दु । वय्कलं भर्चुअल माध्यमं चुनावी अभियान न्ह्याकेगु धयादीगु दु ।
Categorized in अन्तर्राष्ट्रिय
