भारतं नेपालय् अक्सिजन आपुर्ती चायेकल
चौलागा एकादशी ११४१,बैसाख २४ शुक्रवाः
भारतं नेपालय् जुइगु ‘लिक्वीड अक्सिजन’या आपूर्ति चायेकुगु दु । अप्रिल लिपांगु वालंनिसें भारतं देशं पिने अक्सिजन यंकेगुलिइ बन्देज तःगु खः ।
लिपांगु ई नेपालय् लिक्विड अक्सिजन अभाव जुइधुंका निगू देय्या उच्च तगिंमय् सहलह जुयाच्वंगु खः । निगुलिं देय्या राजदूतया तकं कुतः व निगू पक्षीय अनौपचारिक संवादलिपा भारतं नेपाःया नितिं जक ‘लिक्वीड अक्सिजन’ या आपूर्ति चायेकुगु परराष्ट्र मन्त्रालयं न्ह्यथंगु दु ।
भारतया गृहमन्त्रालयं उत्तर प्रदेश व विहार सरकारयात नेपाःपाखे यंकिगु लिक्विड अक्सिजन आपूर्तिइ सहजीकरण यायेत धायेधुंकुगु न्ह्यथंगु दु । थ्व नापं आः नेपालय् अक्सिजनया अभाव मजुइगु सरकारी श्रोतं न्ह्यथंगु दु ।
थ्वहे दथुइ नेपाल विद्युत प्राधिकरणं अक्सिजन प्लान्टय् २४ घौ हे मत मवनिगु याना व्यवस्था जूगु न्ह्यथंगु दु ।
Categorized in राष्ट्रिय
