भारतया उत्तराखण्डय् हिमताल तज्यानाः धौलीगङ्गा खुसि बाः वल, आःतक ११म्ह सित
पोहेलागा द्धादशी ११४१, माघ २६ सोमवाः
भारतया उत्तराखण्डय् हिमताल तज्याःगु दु । हिमताल तज्याःगुनाप खुसि बाः वयाः आःतक ११म्ह मनूत सीगु दुसा २०० सिबें अप्वः तनाच्वंगु दु ।
चमोली जिल्लाया जोशीमठय् हिमताल तज्याःबलय् धौलीगङ्गा खुसि बाः वःगु खः । खुसिया लः थीथी गाँमय् दुहाँवनाः उगु क्षेत्रया मानव बस्तीयात क्षति याःगु दु ।
हिमताल तज्याःगु सुचं चूलाःगुनाप प्रहरीनापया पुचः घटनास्थल थ्यंकाः उद्धार यावंगु दु । इमिसं आः न उद्धार व बेपत्ता जूपिं मनूत मालेज्या यानाच्वंगु भारतीय सञ्चार माध्यमं धागु दु ।
थप क्षतिइ मजुइकेत खुसि जःखःया मनूतय्त स्थानान्तरण याकूगु दु । हिमताल तज्याःगुनाप ऋषिगङ्गा जलविद्युत् आयोजनाय् न क्षति जूगु धागु दु ।
बुखँ एजेन्सी पीटीआईया कथं आयोजनाय् ज्या यानाच्वंपिं सछिम्ह मजदुरत बेपत्ता जूगु दु । सुरुङय् तक्यंपिं १६म्हेसित उद्धार याःगु भारतीय गृह मन्त्रालयं जानकारी ब्यूगु दु ।
Categorized in अन्तर्राष्ट्रिय
