चेन्नई सुपर किंग्सया न्हापांगु जित
लहनान्यूज | चौलाथ्व पञ्चमी ११४१, वैशाख ४ शनिबाः
चेन्नई सुपर किंग्सं इन्डियन प्रिमियर लिग, आइपिएल २०२१ य् न्हापांखुसि कासा त्याकूगु दु ।
चेन्नईलं थःगु निगूगु कासाय् पन्जाब किंग्सयात ६गु विकेटं बुकाः न्हापांखुसि कासा त्याकूगु दु । कासा त्याकेत १०७गु रनया विजयी लक्ष्य ल्यूगु चेन्नईलं १५गु फुती ४गु ओभरय् ४गु विकेटया क्षतिइ कासा पूवंकूगु खः ।
चेन्नईया फाफ डु प्लेसिसं ३३गः बलय् ३गु चौका व १गु छक्कानाप ३६गु रनया योगदान ब्यूगु दु । मोईन अलीं ३१गः बलय् ७गु चौका व १गु छक्कानाप ४६गु रनया योगदान ब्यूगु दु ।
रितुराज गायकड ५गु व सुरेश रैना ८गु रनय् आउट जूगु दु । साम करन ५गु रनय् अविजित जूगु दु । पन्जाबया मोहम्मद शामीं २गु विकेट काःगु दु । अर्शदीप सिंह व मुरुगन आश्विनं १गु–१गु विकेट काःगु दु ।
थ्वसिवे न्ह्यः टस बुनाः न्हापां ब्याटिङ याःगु पन्जाबं क्वःछिनातःगु २०गु ओभरय् ८गु विकेटया क्षतिइ १०६गु रन दयेकूगु खः । पन्जाबया शाहरुख खानं ३६गः बलय् ४गु चौका व २गु छक्कानाप दकले उप्वः ४७गु रन दयेकूगु दु ।
झेय रिचर्डसनं २२गः बलय् २गु चौकानाप १५गु रन दयेकूगु दु । छगु ईलय् २६गु–५गु या कमजोर अवस्थाय् थ्यंगु पन्जाबयात खुगूगु विकेटया नितिं महत्वपूर्ण ३१गु रनया साझेदारी याःगु खः ।
पन्जाबं न्हापांगु कासाय् राजस्थान रोयल्सयात ४गु रनं बुकूगु खः । थौं सनिलय् जुइगु कासाय् मुम्बई इण्डियन्स् व सनराइजर हैदराबाददथुइ धेंधेंबल्ला जुइ ।
