राजस्थानया रोमाञ्चक जित
लहनान्युज | चौलाथ्व चौथी ११४१,बैसाख ३ शुक्रवाः
भारतय् न्ह्यनाच्वंगु १४ क्वःगु संस्करणया आईपीएल टी–ट्वान्टी धेँधेँबल्लाखय् राजस्थान रोयल्स न्हापांखुसी त्याःगु दु ।
वंगु चान्ह्य मुम्बई जूगु कासाय् दिल्लीयात स्वंगु विकेटं बुका राजस्थान रोयल्स न्हापांखुसी त्याकेत ताःलागु खः । दिल्लीं बिउगु १४७ रनया हाथ्या लिछ्याःगु राजस्थानं लिपांगु निगः बलय् न्हेगु विकेट छ्वया पूवंकल ।
राजस्थनया नितिं डेभिड मिलरं दक्वले अप्वः ६२ रन दयेकल । ४३ बल म्हितुगु वय्कलं न्हेगू चौका व निगू छक्का थ्वाःगु खः । अथेहे क्रिस मोरिसं बिस्फोटक ब्याटिङ याना १८ गः बलय् ३६गू रन दयेका राजस्थानयात रोमाञ्चक जित बिउगु खः ।
थ्वसिबें न्ह्यः टस बुना ब्याटिङ ल्यःगु दिल्लीं क्वछिनातःगु २० ओभरय ८गू विकेट छ्वया सच्छि ४७गू रन दयेकूगु खः । दिल्लीया नितिं कप्तान ऋषभ पन्तं अर्धशतकीय पारी म्हितल । वय्कलं ३२ बलय् ९ चौकालिसें ५१ रन दयेकल ।
अथेहे टम करनं २१, ललित यादवं २० व क्रिस वक्सं अविजित १२ रन दयेकल । थ्वसिबेंन्ह्यः न्हापांगु कासाय् चेन्नई सुपर किंग्स (सीएसके) यात बुका दिल्लीं उत्कृष्ट सुरुवात याःगु खः धाःसा राजस्थानं पञ्जावलिसे ४गू रनं बूगु खः ।
थौंया कासा पञ्जाव किङस व चेन्नइ सुपर किङ्स दथुई जुई ।
