कोरोनाया जोखिम अप्वःसेंलि इटालीइ हाकनं लकडाउन
सिल्लागा आंैसी ११४१, फागुन २९ सनिवाः
कोरोना भाइरस संक्रमणया जोखिम हाकनं अप्वया वनेधुंकाः इटालीइ प्रतिबन्धात्मक नियम लागु जुइगु जूगु दु । वइगु सोमबाःनिसें इटालीया आपाःथे क्षेत्रया पसः, रेस्टुरेन्ट व ब्वनेकूत बन्द जुइगु जूगु दु ।
प्रधानमन्त्री मारिओ द्राघीं महामारीया न्हूगु लहरया चेतावनी बीधुंकाः सोमबाःनिसें ब्वनेकू, रेस्टुरेन्ट अले पसःत बन्द यायेत्यंगु बीबीसीं न्ह्यथंगु दु । इस्टरया इलय् अप्रिल ३ निसें ५ तक्क पूवंक बन्द याइ ।
दच्छि न्ह्यः इटालीं महामारी नियन्त्रणय् कायेत न्हापांगु खुसी देय्न्यंक लकडाउन घोषणा याःगु खः । आः नं इटालीइ संक्रमण तच्वकं अप्वयाच्वंगु दु । इटालीइ कोभिड–१९ पाखें आःतक्क १ लख स्वयां आपाः मनूत सीधुंकल ।
बेलायत धुंकाः युरोपय् दक्कले आपाः मनूत सीधुंकल । इटालीइ कोरोना भाइरसविरुद्धया खोप अभियान सुस्त जुयाच्वंगु दु ।
अक्सफोर्ड–एस्ट्राजेनेकां विकास याःगु खोपया हुनिं हि कुनीगु जोखिम दुगु धासें इटालीलिसें युरोपया बुल्गेरिया, डेनमार्क व नर्वेस नं तत्कालया लागिं उगु खोप दिकातःगु दु ।
विश्व स्वास्थ्य संगठनं खोपया हुनिं हि कुनीगु दसि खनेमदुगु धाःगु दु । वं खोप अभियान मदिकेत इनाप याःगु दु । इटालीइ आःतक्क झण्डै ३२ लख मनूतय्के संक्रमण पुष्टि जूगु दु ।
Categorized in अन्तर्राष्ट्रिय
