जनता समाजवादी पार्टी, नेपाल, शिल्पी विशेष प्रदेश व नेवाः राष्ट्रिय समिति नाप समाजवादी विद्यार्थी युनियनं सरकारविरूद्ध येँ छगु विरोध प्रदर्शन याःगु दु।

बुधवाः प्रतिगमन व पेट्रोलियम पदार्थया भाः थकाःगु, जातीय विभेद व मिसा हिंसाविरूद्ध माइतीघर मण्डलाय् विरोध प्रदर्शन याःगु खः। प्रदर्शनकारीपिन्स विरोध प्रदर्शनय् निरंकुश प्रधानमन्त्री मुर्दावाद, मिसापिनिगु हिंसा बन्द याः, सामाजिक सुरक्षा कायम याः, महँगी नियन्त्रण याः, प्रतिनिधिसभा पुर्नस्थापना याः लगायत प्लेकार्ड ज्वना भु थाना व ग्यास सिलिन्डर ज्वना सांकेतिक विरोध प्रदर्शन याःगु खः ।

उमिसं प्रतिनिधि सभा विघटन व हत्या हिंसा अप्वोया वःगु विरोध यासे मुल्यवृद्धि तत्काल लित कायेत माग याःगु खः। ज्याझ्वलय् जसपाया केन्द्रीय नेता राजेन्द्र प्रसाद श्रेष्ठं संविधानयाधारा ७६ (५) कथं दयकूगु सरकारं विश्वासया मत काये मफुगु अवस्था बाहेक मेगु अवस्थाय् संसद विघटन याये मदीइग स्पष्ट व्यवस्था दु धाःसे राष्ट्रपतिं संविधानया संरक्षक व पालनकर्ताया भूमिका निर्वाह मयाःगु धका धाःसे राष्ट्रपती आलंकारिक खः धाःसे प्रधानमन्त्रीं चौरासी ब्यञ्जनय् घाँय् नकूसा नयेगु खःला धका न्ह्यसः तयादीगु खः ।

उगु विरोध प्रदर्शनय् पार्टीया केन्द्रीय सदस्यपि रेखा यादव, लिला सिटौला, दलमर्दन कामी, मनरत्न शाक्य, परिवर्तन भट्टराई, ए.बि.खाती, विद्यार्थी नेता रूपनारायण श्रेष्ठ लगायतपिन्स न सम्बोधन याःगु खःसा केन्द्रीय कार्यकारिणी सदस्य गगा नारायण श्रेष्ठ, केन्द्रीय सदस्यपि राधा तिमिल्सिना, खगेन्द्र माखिम, लाल वहादुर तामाङ, न्हुच्छेलाल महर्जन, इश्वर रिजाल, रत्नविक्रम स्याङ्बो, लालध्वज नेम्बाङ, रविन्द्र थिङ, सिंहवहादुर तामाङपिनिगु न उपस्थिति दुगु खः।

Categorized in राजनीति