बेपत्ता झा दम्पतीया सीम्ह लुत
चिल्लाथ्व त्रयादशी ११४१, चैत्र १३ गते शुक्रबाः
महोत्तरीया पिपरा गांपालिकाय् लच्छि न्ह्यःनिसें लासालिसें हे बेपत्ता झा त्यपुया सीम्ह लूगु दु । महोत्तरीया पिपरा गांपालिका–२ लय् थुनातःगु अवस्थाय् उमिगु सीम्ह म्हिगः लूगु प्रहरीं न्ह्यथंगु खः ।
प्रदेश २ प्रहरी ज्याकूया प्रमुख प्रहरी नायब महानिरीक्षक धिरज प्रताप सिंहया कथं झा त्यपुया छेँय् नं ३ किलोमिटर दक्षिणपाखे ५ फिटया गालय् थुनातःगु अवस्थाय् लूगु सीम्ह तनाच्वंपिं झा त्यपुया हे खःगु धयादिल ।
सीम्ह याकनं ध्वगीमा धकाः चि तकं तयातःगु नं वय्कलं कनादिल । त्यपुया सीम्ह मदुपिनि काय् व काय्चां म्हसीकूगु प्रहरिं धाःगु दु । वंगु फागुन १० गते महोत्तरीया पिपरा गांपालिकास्थित सहोडवां ६५ दँया मोसाफिर झा व वय्कःया तिरि ६० दँया गीतादेवी झायात छेँय् हे द्यनाच्वंगु अवस्थाय् लासालिसें वेपत्ता याःगु खः ।
बेपत्ता जूपिं त्यपु अपहरण द्वपनय् प्रहरीं थ्वयां न्ह्यः प्यम्हेसित ज्वनाः सार्वजनीक नं यायेधुंकूगु दु । ज्वंपिंलय् पिपरा गांपालिका ५, सहोडवाया ५२ दँया रामबाबु यादव, वया हे २६ दँया काय् सुरेन्द्र यादव, चीधिकःम्ह काय् राजेन्द्र यादव व भारत मधुवनी जिल्ला मधवापुरया हरेन्द्र ठाकुर लाःगु दु ।
जिल्ला प्रहरी ज्याकू महोत्तरीं ताःईतक्क बेपत्ता त्यपुया अवस्था सार्वजनिक याये मफयेधुंकाः सीआइबीं अनुसन्धान न्ह्याकूगु निन्हुं हे प्यम्हेसितं घटनाय् ल्हाः दुगु आशंकाय् ज्वनाः सार्वजनिक याःगु खः । घटनाबारे तँसा अनुसन्धान जुयाच्वंगु प्रहरीं न्ह्यथंगु दु ।
