२०७९ श्रावण २५, बुधबार

‘जितः ख्वयेकाः’या म्यूजिक भिडियो सार्वजनिक

लहनान्यूज सम्वाददाता | ने.सं. ११४१ तछलाथ्व नवमी (२०७८ असार ५) शनिबार

कोभिड महामारीयात नियन्त्रणय् कायेत निषेधाज्ञा जारी दुगु अवस्थाया दथुइ हे थौं नेपालभाषाया छपु न्हूगु म्यूजिक भिडियो सार्वजनिक जूगु दु ।

गायिका विष्णुमाया व्यन्जनकारया म्ये ‘जितः ख्वय्काः छ वने फइमखु’ या म्यूजिक भिडियो थौं सार्वजनिक जूगु खः । कलाकार, पत्रकारतय् उपस्थितीइ जुममार्फत जूगु भर्च्युअल ज्याझ्वलय् म्ये सार्वजनिक याःगु खः ।

ज्याझ्वलय् नवासें वरिष्ठ सिने पत्रकार लिसें नेपालभाषा म्यूजिक भिडियोया न्हापांम्ह निर्देशक विजयरत्न तुलाधरं लकडाउनय् नं नेपालभाषाया म्यूजिक भिडियो ख्यलं बांलाःगु गति कयाच्वंगुलिइ लसता प्वंकादिल ।

पत्रकार दर्शनवीर शाक्यं म्येया शैलीयात स्वयाः दर्शकया नं व हे कथंया ई अनुभुति बीमाःगु बिचाः तयादिल ।

पत्रकार बिराजकाजी राजोपाध्यायं म्यूजिक भिडियो वा संकिपा स्वइम्ह दर्शकं उकिया पात्रय् थःत मालेगु यात वा लुइकल धाःसा निर्देशक सफल जुइगु बिचाः तयादिल ।

गायिका व्यन्जनकारं म्योया संगीतकार मदुम्ह पद्मज्योती बज्राचार्यया ज्ञानमाला भजनलिसें आधुनिक म्ये ख्यलय् योगदानयाबारे चर्चा यानादिल ।

ज्याझ्वलय् कलाकार सुरज व्यन्जनकार, स्वतन्त्र संसार महर्जनं नं थःथःगु बिचाः तयादीगु खःसा म्यूजिक भिडियोया संगीत संयोजक जुगल डंगोल, मोडलत अनुप शाक्य, सुषमा बज्राचार्य, रोजिना सुवाल, क्यामेरा निर्देशक व भिज्युअल एडिटर अमर चित्रकार, निर्देशक सुरज नापितं थःथःगु अनुभव न्यंकादीगु खः ।

मदुम्ह मन्त बज्रं च्वयादीगु म्येया म्युजिक भिडियोया बाखं सत्य घटनाय् आधारित धयातःगु दु । हाइलाइट्स नेपाल युट्युब च्यानलमार्फत म्ये सार्वजनिक याःगु खः ।

Categorized in मनोरन्जन