२०८० चैत्र १६, शुक्रबार

तान्जानियाया राष्ट्रपति जोन मगुफुली ६१ दँया बैंशय् मन्त

चौलाथ्व पंचमी ११४१, चैत्र ५ बिहीवाः

अफ्रिकी देय् तान्जानियाया राष्ट्रपति जोन मगुफुली ६१ दँया बैंशय् मन्त । नुगलय् समस्या वयेधुंकाः अस्पताल भर्ना जूम्ह राष्ट्रपति जोन मगुफुली वासः यायेगु झ्वलय् मदुगु खः ।
 
वंगु निवाः न्ह्यःनिसें सार्वजनिक थासय् खने मदयाच्वंम्ह राष्ट्रपति जोनया उसाँय्स जटिलता खनेदयेधुंकाः अस्पताल भर्ना याःगु खः । तान्जानियाया विपक्षी दलया नेतातय्सं वय्कःया कोरोना संक्रमण जूगु धाःसां थुकिया आधिकारिकता पुष्टि मजूनि ।
 
तान्जानियाया उपराष्ट्रपति सामिया सुलुह हसनं राष्ट्रपति मदुगु पुष्टि यासें देशं छम्ह प्रभावशाली व गणतन्त्र पक्षधर नेता तंकूगु न्ह्यथनादीगु दु । राष्ट्रपति मदुगुुलिं तान्जानियाय् १४ न्हुया राष्ट्रिय शोकया घोषणा याःगु दुसा देय्या झण्डा १४ न्हुतक्क बच्छि क्वछुकीगु जूगु दु ।
 
राष्ट्रपति जोन मगुफुली मदयेधुंकाः आः तान्जानियाय् न्हूम्ह राष्ट्रपतिया जिम्मेवारी उपराष्ट्रपति हसनं कःघानादी । जोन मगुफुलीं सन् २०१५ या अक्टोबरनिसें राष्ट्रपति पद कःघानादीगु खः ।
Categorized in अन्तर्राष्ट्रिय