नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबूया काभ्रे शाखाया दँमुंज्या बनेपाया सेन्चुरी होटलय् क्वचाःगु दु ।

काभ्रे शाखाया नायः सिद्धिबहादुर कर्माचार्यया नायःसुइ जूगु थुगु ज्याझ्वः उलेज्या यासें पत्रकार राष्ट्रिय दबूया केन्द्रीय नायः सुरजवीर बज्राचार्यं संघीय लोकतान्त्रिक गणतन्त्र बःलाकेत नेवाः पत्रकारतय्गु योगदान महत्वंजाःगु खँ न्ह्यथनादिल । वय्कलं संचारया थौंया युगलय् नेवाः समाजया सः थनेगु ज्याय् नेवाः पत्रकारपिं न्ह्याबलें न्ह्यज्यायेमाःगु खँ नं न्ह्यथनादीगु खः ।

ज्याझ्वलय् दबूया वरिष्ठ उपाध्यक्ष नृपेन्द्रलाल श्रेष्ठं येँ महानगरपालिकां दबूयात यानाच्वंगु ग्वाहालिया खँ कँसे स्थानीय तहय् स्वापू तयाः पहल यायेमाःगुपाखें ध्यान सालादीगु खः । ज्याझ्वलय् दबूया केन्द्रीय कोषाध्यक्ष सुरेन्द्रभक्त श्रेष्ठं दबुलिं १० लाखया पत्रकार स्वास्थ्योपचार कल्याण कोष स्वनेधुंकूगु खँ न्ह्यथनादिल ।

ज्याझ्वलय् केन्द्रीय ज्यासना पुचःया दुजःपिं विराजकाजी राजोपाध्याय व विजयराम कर्माचार्यं नं थःथःगु खँ तयादीगु खःसा काभ्रे शाखाया सल्लाहकार सुर्यप्रसाद लाकौजुं नेवाः पत्रकारतय्सं मेमेगु भासं नं दक्ष जुयाः पत्रकारिताय् तिबः बिमाःगु, थःगु उपस्थिति क्यनेमाःगु धयादिल । लसकुस यासें काभ्रे शाखाया उपाध्यक्ष सोमकाजी शाक्यं नेपालभाषा, लिपि प्रशिक्षण व क्यालेण्डर प्रकाशनया ग्वसाः दुगु खँ न्ह्यथनादीगु खः । ज्याझ्वःया सभानायः सिद्धिबहादुर कर्माचार्यं काभ्रेया गौरवशाली पत्रकारिता इतिहासया खँ न्ह्यथंसें ब्यवसायिक पत्रकारिता विकास यायेमाःगु खँ न्ह्यथनादीु खः ।

पत्रकार राष्ट्रिय दबू काभ्रे शाखां स्वलापौ पिथनेगु ग्वसाः नं उगु ज्याझ्वलय् ग्वःगु खः।

Categorized in राष्ट्रिय