येँ महानगरपालिकाया मेयर विद्यासुन्दर शाक्यं कमलपूखुलि पुर्ननिर्माण जुयाच्वंगु सन्दर्भय् याकन हे पत्रकार सम्मेलन याना यथार्थ जानकारी बिइ त्यःगु दु।

येँँ महानगरपालिका नगरसभाया च्याक्वःगु अधिवेशनयात सम्वोधन यासे अथे धयादीगु खः । ‘जिमिसं तयार यानागु ड्रोइङ–डिजाइन, जिमिसं यानागु ज्याया बारेय् अनया दक्को बस्तुस्थितिया बारेय् याकन हे छगु पत्रकार सम्मेलन याना जानकारी बिइ,’ मेयर शाक्यं धयादीगु दु, ‘ज्या यायेगु झ्वलय् ठेकेदार कम्पनीं याःगु ज्या गलत जुगु खःसा वयागु सत्यतथ्य जानकारी बिइत जिपि तयार दु ।’ वयकलं कमलपूखुलि ड्रोइङ डिजाइन उगु थासय् तत्कालीन संघीय सांसद  गगन थापा, प्रदेश सांसद, उगु थाय्या विज्ञपि, जेष्ठ नागरिक, स्थानीय संघ–संस्था नाप तःकः तक सहलहयाना सहमति हे पुर्ननिर्माणया ज्या न्ह्याकगु खः धका जानकारी बियादीगु खः।

‘बास्तुविदपि नाप जिमिसं पटक–पटक सहलहयाना उमिगु सुझाव कथं ज्या न्ह्याकगु खः धका धयादीगु दु,’ मेयर शाक्यं, ‘पुर्ननिर्माणया ज्या आःहे क्वःचाये माःगु खः । जिमिसं ठेकेदार कम्पनीयात पटक–पटक ताकेता याना इलय् ज्या क्वचोकेत निर्देशन बियागु दु । तर, आः थीथी कथं आरोप बिया ज्याय् पंगः थनेगु ज्या जुगु दु। थुकिइ जिमिगु ध्यानाकर्षण जुगु दु।’ पुरातत्व विभागं निर्माण ज्या रोके यायत आदेश बिउसा महानगरपालिकां पालना मयागु धका बुखँ वयाच्वंगुलि जिमिगु ध्यानाकर्षण जुगु दु। ‘पुरातत्वं जिमित ज्या रोके यायेत आदेश मवगु धका जानकारी याये चाहे जू । वयकलं अनया बारेय् वःगु बुखँया सन्दर्भय् सामान्य ध्यानाकर्षण चाँहि जुगु खः,’ शाक्यं धयादीगु दु, ‘तर, व हे खँ छगु सरकारी निकाय न मेर्गु  सरकारी निकाय नाप समन्वय हे मयासे सञ्चारमाध्ययमय् वःगु कथं प्रचार थ्व गलत खः।

पुरातत्वं पौ छ्वया हया जिमि नाप समन्वय यायेगु खः । जिमित स्वया न्ह्यः सञ्चारमाध्ययमयात जानकारी याना असहजता ब्वलःगु धाःसा गलत खः । उकिइ जिमिस थुगु बारय् न ध्यानाकर्षण यानागु दु ।’ सांसद थापां मेयरयात पत्र छ्वया हःगु धका सञ्चारमाध्यम पाखे म्वाः मदुगु प्रचार जुगु आरोप बियादीगु दु । ‘जिं वयकःयाःगु पौं आःतक जिके थ्यःगु मदुनि । जितः छ्वया हःगु पौंया बारेय् समाचार ब्वना जक सिइकेफत । वयकलं सम्पदा मासे याना कंक्रिट छ्यल धइगु खः प्रचारप्रति न ध्यानाकर्षण जुगु दु धका धयादीसे । ‘अथे प्रचार याःगु थे मदु । जिमिसं अन प्यःगु थासय् मौलिकता वयेक सम्पदाया न संरक्षण यासे कला व संस्कृतियात म्वाका तयेत प्यःगु मण्डप दयेकेत स्वयागु खः ।

अन महानगरं सम्पदा स्यंकेत स्वलधइगुे प्रचार याःगु दु,’ ‘अन प्रचार जुगु कथंया कंक्रिट हे कंक्रिट मखुसे मौलिकता जाःगु कथंया निर्माण याये त्यनागु दु । अन छु कमजोरी जुगु दु सा सहलह याना समाधान यायेत तयार दु।’ वयकलं सुरुइ दक्को डिजाइन माननीय थापायात क्यनागु खँ न लुमकादीगु दु। ‘उगु इलय् थः निर्वाचित जूगु थासय थुगु पूखुलि व्यवस्थित यायेत महानगरपालिकां हःगु थुगु योजना सफल यायेगु लागि जि प्रतिबद्धता व्यक्त याये धका धाःगु ख,’ वयकलं धयादीगु दु, ‘वयकःपिन्स ला अझ अन सभा याये जिइक दबू हे दयेकेगु  प्रस्ताव यानादीगु खः । जि अथे मयायेगु धका धयागु इलय् वयकःपि लिचिलादीगु खः ।’vपोहेलाथ्व सप्तमी ११४१, माघ ७ बुधवाः

Categorized in राष्ट्रिय