शान्तिपूर्ण “बालुवाटार मार्च” यापिन्त लाठी व लःया फोहोरा
लहनान्यूज | पोहेलाथ्व त्रयोदशी ११४१, माघ १३ मंगलवाः
प्रतिनिधिसभा विघटनविरुद्ध नागरिक आन्दोलनं न्ह्याकूगु “बालुवाटार मार्च”य् झडप जूगु दु ।
बृहत नागरिक आन्दोलनया ग्वःसालय् पिहाँवःगु मार्च भाटभटेनी मन्दिर न्ह्यःने थ्यनेवं प्रहरीं हस्तक्षेप याना लाठी चार्ज याःगु खः ।
लाठी चार्जं नागरिक समाजया न्ह्यलुवा लिसें १२म्ह सिबें अप्वः प्रदर्शनकारीपिं घाःपाः जूगु दु । प्रहरीं प्रर्दशनयात पनेत लःया फोहोरा कयेका लाठीचार्ज तकं याःगु खः ।
पलेस्वाँ पुखुलिं बालुवाटारतक्क शान्तिपूर्ण मार्चपास यायेगु ज्याझ्वःलय् प्रहरीं बल छ्यगुलिइ नागरिक आन्दोलनया न्ह्यलुवापिन्सं तँ पिज्वेकूगु दु । उमिसं थःपिनिगु शान्तिपूर्ण आन्दोलनय् बर्बर दमन जूगुलिइ कुँख्यगु दु ।
उमिसं स्वकूगु जनआन्दोलन आः न्ह्याःगु धयादिल ।
थ्वसिबें न्ह्यः सिमसार पलेस्वाँ पुखुली जुयाच्वंगु कंक्रिटया संरचना निर्माणविरुद्ध न्ह्यानाच्वंगु अभियानय् बृहत नागरिक आन्दोलनं ऐक्यबद्धता याःगु दु ।
आन्दोलनय् ब्वःतिदुपिन्सं पलेस्वाँ पुखु बचाऊया अभियन्तापिनिगु ल्हातिं अनया चाया सिन्ह तिया ऐक्यबद्धता क्यंगु खः ।
उमिसं पुखुया प्राकृतिक स्वरुप हे नासयायेगु कथै जुयाच्वंगु कंक्रिटया संरचन थथें दिकेत माग याःगु दु । महानगरपालिका कमिशनया कासाय् जुयाच्वंगु आरोप तक्कं लगेयात ।
बृहत नागरिक आन्दोलनया न्ह्यलुवापिं पुखुया चाया सिन्ह तिया “बालुवाटार मार्च” ज्याझ्वया नितिं बालुवाटार वंगु खः ।
