सरकारं कन्ह्यनिसे निगु चरणया खोप लगे यायेगु सुरु जुइगु दु । निगु चरण खोपया लागि दूतावास, यूएन एजेन्सीया कर्मचारी व पत्रकारपिन्त प्राथमिकताय् तःगु दु धका स्वास्थ्य मन्त्रालयाया प्रवक्ता डाक्टर जागेश्वर गौतमं धाःगु दु।

वयकःया कथं येँया सिभिल अस्पताल, शिक्षण अस्पताल, सहिद गंगालाल अस्पताल व यलया पाटन अस्पतालय् निगु चरणया खोप बिइगु ज्याझ्वः दु । प्रवक्ता गौतमया कथ सिभिल अस्पतालय् पत्रकारपिन्त, पाटन अस्पतालय् यूएन एजेन्सीइ ज्या याइपि व विदेशी कर्मचारीपिन्त, शिक्षण अस्पताल महाराजगञ्ज व बाँसबारी च्वंगु सहिद गंगालाल अस्पतालय् दूतावास व कूटनीतिक नियोगय् ज्या याइपि नाप विदेशी कर्मचारीया आश्रित मनूतयेत खोप बिइ त्यःगु खः ।

उमित कन्ह्य निसे शुक्रवाः तक खोप बिइगु धका मन्त्रालयं तयारी याःगु दु । खोप कायेत पत्रकारया लागि सूचना विभागपाखे जारी प्रेस प्रमाणपत्र अनिवार्य याःगु दु। खोपया लागि न्हापागु चरणया थे अनलाइनमार्फत सूचीकृत धाःसा यायेम्वाः धका मन्त्रालयं धाःगु दु । थ्व बाहेक मेपिन्त न खोप बिइत थौैं सहलह यायेगु निर्णय यायेत तयारी जुयाच्वंगु दु धका प्रवक्ता गौतमं धाःगु दु ।

Categorized in राष्ट्रिय