किम यो जोङंया बाइडेन प्रशासनयात ख्याच्वः
चौलाथ्व तृतीया ११४१, चैत्र ३ मंगलवाः
उत्तर कोरियाया शासक किम जोङ व वयेकया केहेँ किम यो जोङं ४दँ बाँलाक्क द्यनिगु खःसा थःगु देय्या भूमिइ बारूदया गन्ध न्यंकेत बन्द यायेत अमेरिकी राष्ट्रपति जो बाइडेनया प्रशासनयात ख्याच्वः बिउगु दु ।
सरकारी पत्रिकाय् प्रकाशित जोङया वक्तव्यय् अमेरिका व दक्षिण कोरिया दथुइ वंगु वालय् न्ह्यागु मंका सैन्य अभ्यासया विरोध याःगु दु । अमेरिकी विदेश मन्त्री एन्टोनी ब्लिन्केन व रक्षा मन्त्री लोयड अस्टिनं एसिया भ्रमण न्ह्याकुगु कन्हय् कुन्हु उत्तर कोरियाली शासकया केहँे नं थुकथं ख्याच्वः बिउगु खः ।
सोमबाः जापान थ्यंम्ह ब्लिन्केन व अस्टिन द्वीपक्षीय वार्ताया नितिं कन्हय् दक्षिण कोरिया वनिगु जूगु दु । उमिसं जापान व दक्षिण कोरियाय् याइगु उच्चस्तरीय राजनीतिक खँल्हाबल्हाया केन्द्रय् उत्तर कोरिया हे जुइ ।
उत्तर कोरियाया शासक उनलिसे पूर्वअमेरिकी राष्ट्रपति डोनाल्ड ट्रम्पं वार्ता याःगु खः । वय्कपिं दथुइ कोरियाली प्रायद्वीपय् सैनिक तनाव म्हो यायेगु सहमति न जूगु खः ।
Categorized in अन्तर्राष्ट्रिय
