किपू नगरपालिकाय् नेपाल संवतयात लागू यायेत, नेपालभाषायात सरकारी कामकाजि भाषा कथं लागू यायेत व निजी स्कूलय् नं स्थानीय पाठ्यक्रम नेपालभाषां ब्वंके बिइगु नितिं सोमवाः तःजिक सहलह मुँज्या जूगु दु।

नेपाल संवत ११४६ न्हूदँया लसताय् नेवाः देय् दबू किपू नगर समितिया ग्वसालय् जूगु उगु ज्याझ्वलय् किपूया नेवाः समुदायया प्रतिनिधिपिन्सं नेपालभाषायात कामकाजि भाषा कथं लागू यायेत, नेपाल संवतयात पूर्ण रुपं कार्यान्वयन यायेत नापं निजी स्कूलय् नं नेपालभाषाया माध्यमं स्थानीय पाठ्यक्रम ब्वंकेगु व्यवस्था यायेगु नितिं थःपिन्सं माःगु कथं ग्वहालि यायेत तयार दु धकाः धयादिल। ज्याझ्वः ग्वसाः खलः देय् दबू किपू नगर समितिया नायः बुद्धिलाल ज्यापुया सभानायःसुइ न्ह्याःगु खःसा मूपाहाँ कथं किपू नगरपालिकाया नगर प्रमुख कृष्णमान डंगोल उपस्थित जुयादीगु खः।

अथेहे, ज्याझ्वलय् विशेष पाहाँ कथं किपू नगरपालिकाया उपप्रमुख शुभलक्ष्मी शाक्य सुनिता, भाषा आयोगया दुजः सुरेश किरण मानन्धर, एसियाली आदिवासी जनजाति ऐक्यबद्धता कोषया कार्यक्रम निर्देशक डा. श्रीकुमार महर्जनपिनिगु उपस्थिति दूगु खःसा पाहाँ कथं देय् दबू स्वनिगः विशेष प्रदेशया निर्वतमान नायः नापं नेवाः पत्रकार राष्ट्रिय दबूया संस्थापक नायः श्रीकृष्ण महर्जन, नेपाल आदिवासी कानून व्यवसायी समाजया नायः नरेश श्रेष्ठ, नेवाः देय् दबू येँ जिल्लाया न्वकू रामभोला महर्जनलिसेलिसें शिक्षा समितिया दुजःपिं, किपूया थीथी ख्यःया व्यक्तित्वपिं, नेवाः देय् दबू किपू नगर समितिया सल्लाहकारपिं, थीथी जातीय समाजया प्रतिनिधिपिं, नेवाः प्रथाजन्य संस्था गुथिया प्रतिनिधिपिं, स्कूलया प्रधानाध्यापक, शिक्षक शिक्षिका नापनापं थीथी व्यक्तित्वपिनिगु उपस्थिति दूगु खः।

किपू नगर समितिया बरिष्ठ न्वकू किशोर नेपालीं लसकुस यानादीगु उगु ज्याझ्वलय् शिक्षिका शिलकुमारी महर्जनपिन्सं भिंतुना न्वचू तयादीगु खःसा किपू नगरपालिकाया शिक्षा समिति दुजः शिक्षक राजेन महर्जनं थःगु नुगःखँ तयादीगु खः। शिक्षा समितिया दुजः महर्जनं निजी स्कूलय् नं नेपालभाषाया स्थानीय पाठ्यक्रम दुथ्याकेगु खःसा नगरपालिकां नीतिगत रुपं निर्णय यायेमाःगु आवश्यकता दु धयादिल। पत्रकार व आदिवासी अभियन्ता श्रीकृष्ण महर्जन ज्यापुं ज्याझ्वःया विषयवस्तुयात कया स्पयष्ट यानादिसें किपू नगरपालिकापाखें नीजी स्कूलय् स्थानीय पाठ्यक्रम नेपालभाषां ब्वंके बिइगु नितिं अले नेपालभाषयात कामाजि भाषा यायेगु व नेपाल संवतयात लागू यायेगु नितिं नेवाः देय् दबू नापं समुदाय हे नगरपालिका नापं जाना वनेत तयार दु धकाः यधादिल। अधिवक्ता श्रेष्ठपाखें भाषा, कला संस्कृति व संवतया कार्यान्वयनयात कया कानूनी दृष्टिकोणं यायेफइगु खँ न्ह्यब्वयादीगु खः।

अथेहे, ज्याझ्वलय् अन्तर्राष्ट्रिय आदिवासी व किपूया सवाल विषयस डा. श्रीकृमार महर्जनं नेपालय् हे न्हापांखुसि सांस्कृतिक संरक्षित क्षेत्र ऐन किपू नगरपालिकां दयेकूगु तसकं च्वछायेबहःजू धयादिसें उकियात कार्यान्वयन याना वनेमाःगु खँय् बः बियादल। ज्याझ्वलय् भाषा आयोगया दुजः सुरेश किरण मानन्धरं स्थानीय तह सरकार दुनेया थीथी ब्वनेकुथि नेपालभाषा अध्ययन अध्यापनलिसें स्थानीय सरकारं नेपालभाषाप्रति यायेमाःगु ज्याखँयात कयाः नुगःखँ तयादीगु खः। इच्छा शक्ति दयेवं नेपालभाषायात कामाकाजि भाषा कथं लागू यायेफैगु, नेपाल संवतयात छ्यलेफैगु व नीजि स्कुलय् नं स्थानीय पाठ्यक्रम नेपालभाषां ब्वकं फइ धकाः धयादिल।

किपू नगर दुने स्थानीय पाठ्यक्रम नेपालभाषा स्थानीय भाषापाखें सार्वजनिक ब्वनेकुथिइ ब्वंकेगु ज्या यानाच्वंगुलिं किपू नगरपालिकायात सगंपौ हनापौ लःल्हायेगु ज्याझ्वः अन्तर्गत सगंपौ हनापौ किपू नगरपालिकाया नगर प्रमुख कृष्णमान डंगोल व उपप्रमुख शुभलक्ष्मी शाक्य सुनितायात लःल्हायेगु ज्या जूगु खः। ज्याझ्वलय् नेपालभाषा शिक्षक देवआनन्द महर्जन, प्रा.डा. बज्रमुनि बज्राचार्य, कीर्तिपुर माध्यमिक विद्यालयया पुलांम्ह प्रधानाध्यापक निलकण्ठ अमात्यलिसें थीथी व्यक्तित्वपिन्सं नुगःखँ तयादीगु उगु ज्याझ्वलय् किपू नगरया नगर प्रमुख डंगोललिसें उपप्रमुख शाक्यं नं नुगःखँ तयादीगु खः। किपू नगरपालिकाया मेयर डंगोल व उपमेयर शाक्यं भाषा, कला संस्कृतिया नितिं समुदायलिसे जाना ज्या याना वनेत थःपिं तयार दु धयादिसें समुदाय हे सक्रिय जुइमाः धयादिल।

Categorized in राष्ट्रिय