येँ महानगरपालिकाया प्रमुख विद्या सुन्दर शाक्यं मुर्त–अमुर्त सम्पदाया संरक्षणय् येँ महानगरपालिका एकाग्र जुयाः न्ह्याःवनाच्वनागु धयादीगु दु ।

येँ महानगरपालिका वडा नं. २१ स्थित लगं त्वालय् दुगु ऐतिहासिक कीर्तिपुण्य महाविहारया आगंछेँ पुनर्निर्माणया शिलान्याश यासें महानगर प्रमुख शाक्यं परम्परा, इतिहास, सँस्कृति व संस्कारयात म्वाकातय्त येँ महानगरं फक्व ग्वाहालि यानाच्वनेगु अले उकी सकलें छधी जुयाः न्ह्याःवने नं आवश्यक दुगु धयादिल । आः महानगरपालिकां सम्पदा निर्माण, पुनर्निर्माणय् याःगु लगानी सलंसः दँया लागिं लुमन्ति कथं ल्यनीगु बिचाः तयादिल ।

‘प्राचिनकालय् दक्षिण कोलिग्राम सभ्यतां म्हस्यूगु येँया क्वःने लागाय् अवस्थित लगं बहाः ऐतिहासिक अले पुरातात्विक महत्वया बिहार खः । बुद्ध शासनकाललिसे स्वानाच्वंगु थुगु ऐतिहासिक बिहारया पुनर्निर्माण याय्खंगु येँ महानगरपालिकाया नितिं नं गौरवया खँ खः’ शाक्यं धयादिल । येँ महानगरपालिकां पुनर्निर्माण यानाबीवं तुं स्वामित्व नं येँ महानगरपालिकां काइगु भ्रम नं दयाच्वंगु धासें थज्याःगु सम्पदाया पुनर्निर्माण याय्धुंकाः महानगरपालिकां सम्वन्धित समुदाययात हे लःल्हानाबीगु खँ शाक्यं लिसा कयादिल ।

ऐतिहासिक, धार्मिक व पुरात्वात्विक महत्वया सम्पदाया संरक्षणया नितिं येँ महानगरपालिकां माक्व बजेट विनियोजन यानागु धासें गनं नं छुं कथंया सम्पदा पुनर्निर्माण, जिर्णोद्धार याय्माःसा येँ महानगरपालिका तयार दुगु शाक्यया धापू खः । येँ महानगरपालिका हनुमानढोका दरबार क्षेत्र संरक्षण कार्यक्रम अन्तरगत पुनर्निर्माण जुइत्यंगु कीर्तिपुण्य महाविहारया आगंछेँया लागत २ करोड ८५ लाख दु ।

पुनर्निर्माणया ज्या २०७८ मंसिर तक्कय् क्वचाय्केगु आज्जु तःगु दु । महानगरपालिकां थ्वयां न्ह्यः हे लगं बहाः दुने हे दुगु दिगुद्यः नं पुनर्निर्माण याय्धुंकूगु दु । २०७२ सालया तःभुखाचं क्षतिग्रस्त जूगु दिगुद्यःया नं मेयर शाक्यं हे उलेज्या यानादीगु खः ।

Categorized in राष्ट्रिय