सरकार व नेपाल कम्युनिस्ट पार्टीदथुई स्वंगु बुँदे सहमतिइ ल्हाःचिं, नेपालय् आः हिंसात्मक द्वन्द्व मदु : प्रम ओली
राम डंगोल | सिल्लागा षष्ठी ११४१, फागुन २० बिहीवाः
नेत्रविक्रम चन्द ‘विप्लव’ नेतृत्वया नेपाल कम्युनिष्ट पार्टी व सरकार दथुई सहमति जूगु स्वंगु बुँदे सम्झौताय् थौं ल्हाःचिं तःगु दु ।
राष्ट्रिय सभागृहलय् थौं ग्वसाःग्वःगु ज्याझ्वलय प्रधानमन्त्री केपी शर्मा ओली व नेपाल कम्युनिस्ट पार्टीया महासचिव नेत्रविक्रम चन्दया न्ह्यलूवाय् सहमतिपत्रय् ल्हाःचिं तःगु खः ।
सरकारपाखें गृहमन्त्री रामबहादुर थापा व नेपाल कम्युनिष्ट पार्टी पाखें खड्ग विश्वकर्मां सहमतिपत्रय् ल्हाः चिं तयादीगु खः ।
ज्याझ्वःयात सम्बोधन यासें प्रधानमन्त्री केपी शर्मा ओलीं नेपालय् आः दक्वः धैथें हिंसात्मक द्वन्द्वया अन्त्य जूगु धयादिल ।
नेपालय् हिंसात्मक लँपू मन्त, हिंसात्मक कार्यदिशा वनिपिं सुं नं मन्त धासें शान्तिया न्हूगु लँपुइ झाःपिं नेपाल कम्युनिष्ट पार्टीया महासचिव नेत्रविक्रम चन्दयात सफलताया नितिं भिन्तुना देछानादिल ।
शान्तिया लँपुई वया विप्लबं साहसिक ज्या याःगु धासें थ्वः ‘फोर्सल्याण्डिङ मजुसे सेफ ल्यान्डिङ खः’ धयादिल ।
सुसुं मनुतय्सं चाःचाः सहलह जूगु धकाः प्रचार यागुलिइ प्रधानमन्त्री ओलीं कुँखिनादिल । वय्कलं धयादिल ‘थ्व सहमति यक्वः हे ताःहाकेक यानागु प्रयासया परिणाम खः’ वय्कया धापू खः ।
नेपाल कम्युनिस्ट पार्टीया महासचिव नेत्रविक्रम चन्द विप्लवं सरकारलिसे जूगु सहमति नालाकायेत थःगु पार्टी प्रतिबद्ध दूगु धयादिल ।
सहमति धुंका दूगु ह्वःतायात बाँलाका यंकेगु धासें थःपिन्सं दक्व शक्तिलिसें छप्पं जुया न्ह्यःने वनेत तयार जूगु धयादिल ।
नेपाःमिपिनिगु शान्ति व समृद्धिया भलसाय् सहमतिं ग्वःहालि याइगु महासचिव विप्लवं धयादिल ।
नेपाःमिपिन्सं आःतक्क नं स्वतन्त्र कथं क्वछिइगु अधिकारया अनुभव यायेमखंगु व उकिया नितिं थःपिं न्ह्यनाच्वनाु वय्कलं धयादिल ।
महासचिव विप्लवं हलिमय् कम्युनिस्टपिनिगु विजय जूसा जक युद्धया अन्त्य जुइगु जिकिर यानादिल ।
सहमतिइ पौखय् विप्लव नेकपां थःगु दक्वः राजनीतिक विषयया समाधान संवादपाखें हे क्वचायेकेगु, राजनीतिक गतिविधि शान्तिपूर्ण रुपं न्ह्याकेगु व नेपाल सरकारपाखें तयातःगु नेपाल कम्युनिष्ट पार्टीयात तयाःतगु प्रतिबन्ध लितकायेगु, दक्वः बन्दीत त्वःतेगु व मुद्दा नं खारेज यायेगु न्ह्यथनातःगु दु ।
हिंसात्मक गतिविधि न्ह्यानाच्वंगु धासें सरकारं २०७५ या फागुन २८ गते विप्लव नेतृत्वया नेकपायात प्रतिबन्ध तःगु खः ।
बिहीबारया मन्त्रिपरिषद् बैठकं सरकारी वार्ता टोली व विप्लव पुचः दथुई स्वंगु बुँदे सहमति अनुमोदन याःगु खः ।
