आःया चुनावं माधवकुमार नेपाल सांसद तकं मजुइगु प्रधानमन्त्री ओलीया दाबी
चिल्लागा, प्रतिपदा ११४१, चैत्र ३१ गते मंगलबाः
प्रधानमन्त्री केपी शर्मा ओलीं नेपाल–खनाल पुचःयात थप कारबाही यायेगु ख्याच्वः बियादीगु दु । पार्टीइ लिच्वः लाकीकथं ज्यापहः यानाजूसा कारबाही जुइगु ओलीं ख्याच्वः बियादीगु खः ।
नेपाल उत्पीडित जातिय मुक्ति समाजया राष्ट्रिय मुनायात म्हिगः सम्बोधन यानादिसें प्रधानमन्त्री ओलीं थःविरुद्धया टिकाटिप्पणीयात सहः यानाच्वनागु तर पार्टीयात लिच्वः लाकीगु ज्यापहः जूसा थप कारबाही यायेगु ख्याच्वः बियादीगु खः । प्रधानमन्त्री अले एमालेया नायः ओलीं नेपाल पुचलं थःत कारबाही याःगुलि ध्याचू न नकादीगु खः ।
प्रधानमन्त्री ओलीं बहुमत सरकारया नेतृत्व यानागु जुयाः थःम्हं राजीनामा मबीगु उल्लेख यानादिसें समर्थन लित कयाः क्यनेत हाथ्या बियादिल । वय्कलं थःत सुयां समर्थन म्वाःगु न धयादीगु दु ।
प्रधानमन्त्री ओलीं थः हे सांसद जुइगु हैसियत त्वःफीकेधुंकूम्ह नेता नेपालं मेमेपिन्त टिकट बिइ धायेगु ख्याःखँ जूगु न धयादिल ।
अपराधपूर्ण ज्यापहःया क्षमायाचना याःसा नेता नेपालयात पार्टीइ हाकन ज्या याकेबीगु प्रधानमन्त्री ओलीं धयादिल । वय्कलं पार्टीइ च्वनाः ज्या याकेबीगु तर गुटबन्दी यायेगु छ्यापं मबीगु न धयादिल ।
नेकपा माओवादीया नायः पुष्पकमल दाहाल प्रचण्डयात किकाः थ्यंमथ्यं स्वब्वय् निब्वया पार्टी ब्वःथलाः आःया सरकार क्वःथलेत मेमेगु पार्टीया नेतालिसे बिन्ती यानाजूगु प्रधानमन्त्री ओलीया द्वपं दु ।
Categorized in राजनीति
