रत्नराज्यलक्ष्मी क्याम्पसया नेपालभाषा शिक्षक, नेपालभाषा ब्वनामि (विद्यार्थी)पिन्सं शिक्षा, विज्ञान व प्रविधिमन्त्री कृष्णगोपाल श्रेष्ठयात सिंहदरवारय् नापलाना भिंतुना लिसें ज्ञापन पौ लःल्हायेगु ज्याझ्व जूगु दु ।

उगु ज्ञापन पतिइ रत्न राज्यलक्ष्मी क्याम्पसया नेपालभाषा स्यनामि (शिक्षक) प्रा.डा. चन्द्रमान बज्राचार्य नाप क्याम्पसया नेपालभाषा ब्वनामि नाप नेवाः विद्यार्थी युनियन अधक्ष्य रीदेन महर्जन, महासचिव प्रशान्त, युनियन दुजःपिं सुरोज महर्जन, सृजनमान श्रेष्ठपिंसं ज्ञापन पौ लः ल्हाःगु खः । ज्ञापन पतिइ धयातःगु दु, स्वनिगःया आशा, भरोसाया, धिसिलाःगु थां छिस्कर माननीय कृष्णगोपाल श्रेष्ठजु शिक्षा, विज्ञान व प्रविधिमन्त्री नियुक्त जुयादीगुलि नेवाः विद्यार्थीतय्गु मंकाः संगठन नेवाः विद्यार्थी युनियनपाखें वयकःया कार्यकाल सुथां लायेमा धकाः भिंतुना देछायाच्वना ।

थौंकन्हय् स्वनिगःया क्याम्पस मध्ये बि.ए. तगिंमय् दकले अप्वः नेपालभाषा ब्वनामिपिं दु । उकीमध्ये न्हापांगु तगिं स्वंगूगू तगिमय् यानाः मुकं ब्वनामिपिं (५३ म्ह) न्यय् स्वंम्ह ब्वनामि थ्यंगु जूसांतबि ब्वनामिपिन्त क्याम्पस प्रशासनपाखें ब्वनेगु कुथि म्हो ब्वनामिपिन्त मालेगु सफू हलं ज्वल म्हो जूसांनं थुगु समस्या ज्यंकेगु खँय् सम्बन्धित निकायलिसें प्रशासनं बेवास्ता यानाः च्वनाच्वंगु जुल ।

थुगु क्याम्पसय् थौंकन्हय् नेपालभाषा मास्टर्स तगिमय् झीगु मातृभाषा नेपालभाषा ब्वनेगु अधिकारपाखें बन्चित जुयाच्वंगु दुःखद् खँ न्ह्यब्वसें थुकियात इलय् माननीय मन्त्रीपाखें फयांफच्छि न्हापलाक्क सम्बोधन यानादीगु भलसा कासें थुगु ज्ञापन पौ लःल्हानागु जुल ।

ज्ञापन पौ लःल्हाना कयादिसे शिक्षामन्त्री श्रेष्ठं रत्न राज्यलक्ष्मी क्याम्पसया नेपालभाषा ब्वनामिपिन्त जुयाच्वंगु समस्यायात याकनं ज्यकेगु धकाः बचं बियादीगु दु ।पोहेलाथ्व नवमी ११४१, माघ ९ शुक्रवाः

Categorized in राष्ट्रिय