कृष्णभक्त व बानिकाया ‘माखायात ग्वंगः माः’ पिहांवल थौंकन्हय् हङकङय् च्वनाच्वंम्ह संगीतकःमि कृष्णभक्त महर्जनया म्ये ‘माखायात ग्वंगः माः’ सार्वजनिक जूगु दु ।

बिहिबाः यलय् ख्यालि जुजु मदनकृष्ण श्रेष्ठया उपस्थितीइ जूगु छगू ज्याझ्वःया दथुइ उगु म्येया म्यूजिक भिडियो सार्वजनिक याःगु खः ।

ज्याझ्वलय् यल महानगरपालिका १६ वडाया वडाध्यक्ष निर्मलरत्न शाक्य, वरिष्ठ सिने पत्रकार बिजयरत्न असंबरे, किपू नगरपालिकाका पूर्व नगर प्रमुख रमेश महर्जनलिसेंनं नेपालभाषाया संगीत ख्यलय् छपु बांलाःगु म्ये वःगु धासें भिन्तुना देछानादिल ।

सार्वजनिक जूगु म्येया संगीत संयोजक हरिशरण सायमिं म्ये व म्यूजिक भिडियो निर्माण पक्षबारे जानकारी बियादिल । म्येहालामि महर्जनया नुगःखँ धाःसा भिडियो सामग्रीमार्फत क्यंगु खः ।

ज्याझ्वलय् म्ये व म्यूजिक भिडियो निर्माणय् योगदान ब्यूपिं कलाकार, प्राविधिकतयत सम्मान याःगु खः । ख्यालि जुजु श्रेष्ठं सकल कलाकार व प्राविधिकतयत हनापौ लःल्हानादिल ।

उगु हे ज्याझ्वलय् संगीतकःमि हरिशरण सायमि, म्येहालामि सतिश महर्जन, यमन श्रेष्ठ, बानिका प्रधानलिसें नं म्ये हालाः न्ह्यब्वयादीगु खःसा कलाकार कृष्णभक्त महर्जनं हुलाप्याखं न्ह्यब्वयादीगु खः ।

सार्वजनिक जूगु म्ये ‘माखायात ग्वंगः माः’ च्वयेगु व लय् तयेगु ज्या नं म्येहालामि महर्जनं हे यानादीगु दु ।

कलाकार किरण जोशी व आराध्यालक्ष्मी खड्गीं अभिनय यानादीगु म्यूजिक भिडियोया निर्देशन बालमुकुन्द प्रजापतिं यानादीगु खः । छायाङ्कन व दृश्य सम्पादन शैलेस श्रेष्ठ लुभुं यानादीगु दु ।

केभिएस लुभु प्रोडक्सन हाउसया ब्यानरय् दयेकूगु म्यूजिक भिडियो म्येहालामि महर्जनया हे युट्युब च्यानलमार्फत सार्वजनिक जूगु दु ।

Categorized in मनोरन्जन