येँ महानगर नगर सभाया च्याक्वःगु अधिवेशन सुरु जुगु दु । उगु सभाय् स्वगु विधेयक न्ह्यब्बःगु दु । उगु बैठकय् ‘येँ महानगरपालिका वातावरण तथा प्राकृतिक स्रोतया संरक्षण यायेत दयेकूगु विधेयक– २०७७’, ‘येँ महानगरपालिका बजार व्यवस्थापन तथा अनुगमन विधेयक– २०७७’ व ‘येँ महानगरपालिका संस्था दर्ता तथा नियमन सम्बन्धी विधेयक– २०७७’ पेश याःगु खः।

उगु विधेयक विभागीय प्रमुखपि हरिकुमार श्रेष्ठ, हरिबहादुर भण्डारी व दीपक अधिकारीपिन्स न्ह्यब्बःगु खः। विधेयक वइगु माघ ७ गतेया बैठकय् निर्णयउा लागि पेश जुइगु महानगरपालिकां जानकारी बिःगु दु । पुस २४ गते च्वंगु महानगरंया ५५ क्वःगु कार्यपालिका बैठकं थौंया सभाय् न्ह्य ब्बय्गु प्रस्ताव स्वीकृत याःगु खः । येँ महानगरपालिकाया मेयर विद्यासुन्दर शाक्यया अध्यक्षताय् न्ह्याःगु बैठकय् चालु आर्थिक दँया ५९ गु  ज्याझ्वलय् संशोधन प्रस्ताव याःगु खः ।

थज्यागु प्रस्ताव याःगु ज्याझ्वः निशुःक वितरणया लागि वासः न्यायेगु, सार्वजनिक सम्पत्तिया मर्मत व संरक्षण, स्वास्थ्य उपकरण खरिद, देगः, सतः, गुथिया छेँ सांस्कृतिक संरचनाया पुननिर्माण, मर्मत सम्भार तथा सौन्दर्य दयेकेगु, सतक स्तरोन्नति यायेगु, धः व मंगाः निर्माण यायेगु ज्याझ्वः खः । अथेहे सरकारी व सामुदायिक अस्पताल नाप सहकार्य, यातायात व सुरक्षा व्यवस्थापन नगर साझेदारी ज्याझ्वः खः। न्ह्यक्वःगु नगर सभापाखे स्वीकृत ज्याझ्वः मध्ये छु ज्याझ्वःे शीर्षक मिले यायेगु, छु स्रोत सुनिश्चित यायेगु, कार्यान्वयनय् मवःगु ज्याझ्वः योजना हिलेमाःगुलि बजेट संशोधन प्रस्ताव याःगु खः ।

‘थीथी वडापाखे पूर्वाधार निर्माणय् यक्को माग जुगु दु,’ सभाया अध्यक्ष नाप मेयर शाक्यं धयादीगु दु, ‘अज्यागु मागयात लागतम रुपान्तरण यासे अरबौया बजेट वयेफु । थथे माग जुगु योजनायात वइगु दँया ज्याझ्वलय् तयेथु जुइ धका धयादीगु दु  । आः स्वीकृत नीति व ज्याझ्वलय् नाप कानुनं बिःगुे अधिकार प्रयोग यासे छु शीर्षक हिलेइगु बजेट संशोधन प्रस्ताव यानागु खः।’

थौंया सभाय् उपाध्यक्ष नाप उपप्रमुख हरिप्रभा खड्गी श्रेष्ठ, सभाया सचिव नाप प्रमुख प्रशासकीय अधिकृत राजेश्वर ज्ञवाली, सहरी योजना आयोगया उपाध्यक्ष सरोज बस्नेत नाप नगर सभा सदस्यपि सहभागी जुयादीगु खः। 

Categorized in राष्ट्रिय