लहना वाःपौ नेवाः संचार ख्यःया नितिं गर्वया विषय खः
बिराजकाजी राजोपाध्याय | बछलागा षष्ठी ११४६, बैसाख २४ बिहीवाः
छुं नं ज्याया सुरुवात तःधंगु खँ मखु, उकिया निरन्तरता दकले तःधंगु खँ खः। ज्या न्ह्याकेधुंकाः उकियात निरन्तरता बियाच्वनबलय् अवस्था छगू हे जुयाच्वनी मखु । थथ्याःक्वथ्याः वया हे च्वनी, थीथी हाथ्याया सामना याये माला हे च्वनी । लहना वाःपौया १३ दँया यात्राया झ्वलय् जक अज्याःगु थथ्याःक्वथ्याः, हाथ्याया सामना यायेम्वाःगु, अःपुक हे पत्रिका पिदनाच्वंगु ला पक्कां हे मखु । बजारया समस्या, उकिया दथुइ, ७२ सालया भुखाय्, कोरोना महामारीलिसें मेमेगु आपालं समस्या व हाथ्याया दथुइ नं थौं लहनां १३दँया यात्रा पूवंकूगु धइगु ख्याः खँ पक्कां हे मखु । हाकनं धायेगु खःसा लहनाया १३दँया निरन्तरया यात्रा धयागु सकल नेवाः संचार ख्यःया नितिं हे गर्वया विषय खः।
थौंकन्हय्या डिजिटल युगय् छापा पत्रकारिता तसकं हाथ्यां जाःगु ज्या जुइधुंकल । फेसबुक स्टाटसयात समाचार धकाः थुइकीगु जुयावःबलय् मूलधारया पत्रकारिताया लँ तसकं थाकु । थज्याःगु अवस्थाय् छगू पत्रिका पिथनाच्वने उलि अःपूगु ज्या मखु । हरेक समस्या, हाथ्यायात फायाः लहना थौं १३दँ पूवंकाच्वंबलय् लहनालिसे जिगु आवद्धता, थीथी कथंया सहकार्ययात लुमंकाच्वना ।
लहनाया सुरुवाती इलंनिसें थीथी च्वसुत च्वयावया । विशेष यानां थःगु कल्चर बिटय् हे च्वसा न्ह्याकावयागु खः । लहनाय् थःगु च्वसा न्ह्याकेगु झ्वलय् संस्कृतिया नापनापं यक्व हे सामाजिक, राजनैतीक, शिक्षा क्षेत्रलिसे नं सम्वन्धित जुयाः थीथी मेमेगु विषयस नं च्वसा न्ह्याकागु दु । न्हापा नेवाः पत्रपत्रिकाय् च्वयेगु धयागु लय्ता ज्या जक जुयाच्वंगु खः । यक्व हे च्वसुत च्वया तर, नेवाः भाषां च्वयाः आर्थिक रुपं छुं वइ धकाः बिचाः तक नं यायेमखं । तर लहनाय् च्वयेगु न्ह्यायेधुंकाः नेवाः भाषां च्वयेबलय् नं छुं छुं वः खनी धइगु सिल जक मखु, आः नेवाः पत्रकारिता ख्यः व नेवाः संचार ख्यः नं व्यावसायिक रुपं न्ह्याःवने फइ धइगु बिचाः स्थापित यात ।
लहनां यानावःगु थीथी ज्याझ्वःया उद्घोषक, ज्याझ्वः न्ह्याकामि कथं नं जिगु भूमिका दत । लहनाया थीथी वार्षिकोत्सव ज्याझ्वलय् नं जिं ज्याझ्वः न्ह्याकागु दुसा जगत सुन्दर ब्वनेकुथिलिसे जानां लहनां ग्वसाः ग्वःगु जनकवि दुर्गालाल श्रेष्ठया हना ज्याझ्वः ‘जगत सुन्दर दबू’, गोल्डन भ्वाइस अफ नेपाल प्रेमध्वज प्रधानया हना ज्याझ्वः, वरिष्ठ निर्देशक रचनाकार पवन जोशीया हना ज्याझ्वः नं जिं हे उद्घोषण यायेखन । छगू इलय् ला लहनाया ज्याझ्वः जुइगु जुलकि हे सकसिनं ज्याझ्वः न्ह्याकामि बिराज हे ला खः नि धाइगु जुयावःगु खः । ज्याझ्वलय् न्ववाइपिं वक्ता, म्ये हालेत्यंपिं, प्याखं ल्हुइत्यंपिं कलाकारया छुं धायेमालकि जितः हे फोन याइगु ।
थनथाय् लाक्क लहनायात सुभाय् देछाय्माःगु छगू विषय नं लुमंके । स्कूलया विद्यार्थी जीवननिसें हे विश्वभुमिइ पत्रिकाय् च्वयेगु न्ह्याकागु खः । वयां लिपा गुडनाइट एफ.एम. नेपालभाषा ज्याझ्वलय् बुखँ ब्वनेगु न्ह्याकेधुंकाः थीथी रेडिया स्टेशन जुजुं थौंतक नं ईमेज च्यानलय् ईमेज बुखँमार्फत ब्रोडकास्टिङ मिडियाय् नेवाः भाषा माध्यमं पत्रकारिताय् निरन्तर न्ह्याना हे च्वनागु दनि । छुं सिरपाः व सम्मानया लोभ मखुसां इलय्ब्यलय् जिं यानाच्वनागु ज्यायात सुनां स्वयाच्वंगु, मूल्याङ्कन यानाच्वंगु दु ला ? धइगु न्ह्यसः धाःसा नुगलय् दनावः । उकिया लिसः लहनां हे बिल धायेमाली । ने.सं. ११४२ सालय् पत्रकारिता ख्यलय् बियावःगु योगदानया कदर धासें लहनाया वार्षिकोत्सव ज्याझ्वलय् जितः लहना धर्ममोति पत्रकारिता सिरपालं हंगु खः । उकिया नितिं आपालं सुभाय् दु ।
नापं, अबुजु आर.के. निर्मलं न्हापा जापानिज भाषाया छगू मचा उपन्यास नेवाः भासं अनुवाद यानाबिज्यानां सिरिजया रुपय् विश्वभुमि पत्रिकाय् पिथनाबिज्याःगु दुगु । व सिरिज पूवनेमलाःनिबलय् विश्वभुमि पत्रिका दिनावन । अबुजुं छकः खँ ल्हानाच्वँच्वं उकियात सफूया रुपय् पिथनेदुसा ज्यूगु धकाः खँ तयाबिज्यात । सफू पूवनकि छु यानां पिथनेमाः पिथने, व जिगु जिम्मा जुल धया । अबुजुं सफू ला पूवंकाबिज्यात । पिथनेगु गथे ? सु पिकाकःयात धायेगु जुयाच्वंबलय् लहनाया व्यवस्थापक सुरेन्द्रभक्त श्रेष्ठं थ्व सफू झीसं हे पिथने धाःवल । अबुजुया ज्याःजंक्वया दिनय् छगू सरप्राइज कथं उगु सफू जंक्व भ्वजय् हे बिमोचन यानां पिदन । थ्व छगू मूवंगु उपहारया नितिं लहना मिडियायात आपालं सुभाय् देछाये ।
आः लहनालिसे हाकनं मेगु सहकार्यया नितिं पलाः न्ह्याकेत्यना । जि व किजा रक्षण जानां न्ह्याकाच्वनागु कन्फराक्टीभ मिडिया व लहना जानां लहनाएक्टिभ म्यूजिक भिडियो अवार्ड ग्वसाः ग्वयेत्यना । ‘श्रृजनाया उत्थान, स्रष्टाया सम्मान’ या नितिं लहना व कन्फराक्टीभया थ्व मंकाः पलाखय् सकल कलाकर्मी व कलाप्रेमीया साथ, हःपाः, तिबः धइगु विश्वास प्वंकाच्वना ।
