लहना वाःपौ १३ दँ दुगु लसताय् छगु तःजिक ज्याझ्वः जुगु दु। प्रतिनिधि सभा सदस्य कुलभक्त शाक्यं छगु ज्याझ्वलय् पत्रकार तय्त सिरपाः नाप लहना गौरव ११४६ सम्मान नापं लहना मिडियां नेपाः टिभिइ याकनय् हे प्यंगू ज्याझ्वः यायेगु घोषणा न याःगु दु।

लहना मिडिया व कन्फराक्टीभ मिडिया मंकाः कथं लहनाएक्टीभ म्यूजिक भिडियो अवार्ड ज्याझ्वः यायेगु घोषणा जूगु दु। अथेहे विन्द्रराज ताम्रकारपाखे च्वयादीगु नेपालभाषाया सफू पुस्तक संस्कृति, समाज व व्यवसाय’ या पितब्बज्या न जुगु दु। प्रतिनिधि सभा सदस्य कुलभक्त शाक्यं सरqaकारी विज्ञापन नीजि संचार माध्यमयात विज्ञापन मबिइगु सरकारं निर्णय विरुद्ध संसदय् सः थ्वयेकिइगु जुइ धका न धयादीगु दु।

ज्याझ्वलय् नुँगः खँ तयेगु झ्वलय् संघीय सांसद शाक्यं वर्तमान इलय् संचारमाध्यम उलि हे थाकुया च्वंगुलि लिपागु इलय् सरकारया निर्णय न नीजि संचारमाध्यमयात गःपःतिइगु ज्या जुगु दु धका धयादीगु खः। नेपालभाषाया रंगीन वाःपौ ‘लहना वाःपौ’ या १३ दँ दुगु लसातय् जुगु उगु ज्याझ्वलय् सांसद शाक्यं अथे धयादीगु खः। ‘जनताया सः न्ववाइगु संचारमाध्यमयात संरक्षण यायेमाःगुलि अःखतं सरकारं बिया वयाच्वंगु सुविधा क्वपालेगु दुःखया खँ खः धका धयादीगु खः। जिं थुकिया सम्वन्धय् नीजि संचारमाध्यम नाप मातृभाषी संचारमाध्यमया पक्षय् संसदय् सः तयेगु जुइ’ धका शाक्यं धयादीगु खः।

ज्याझ्वलय् नुँगः तयेगु झ्वलय् येँ महानगरपालिकाया निवर्तमान प्रमुख विद्यासुन्दर शाक्य, नेवाः देय् दबूया नायः रश्मिला प्रजापति, नेपाल आदिवासी जनजाति पत्रकार महासंघया अध्यक्ष लक्की चौधरी, प्रेस काउन्सिल नेपालया मुख्य अधिकृत झविन्द्र भुसाल नेपालभाषां पिहावयाच्वंगु लहना वाःपौ नेवाः तयेगु गर्व कथं न्ह्या वयाच्वंगु दु धका धयादीगु खः। अथेहे सम्मानितपाखे नेपाल समाचारपत्रया सहायक सम्पादक महर्जन व सिरपाया दातापाखे जगतबीर सिंह कंसाकार व डा. विजय प्रकाश सैंजुं नुँगः खँ तयादीगु खः। ज्याझ्वलय् २० हजार नगद राशी लहना धर्ममोति पत्रकारिता सिरपा ११४५ या निति एपिवानकःमि राजु नापितयात व ११४६ या निति खबरसेन्टर अनलाइनया सम्पादक उत्तमकुमार श्रेष्ठयात लःल्हागु खः।

अथहे १० हजार नगद राशी दुगु लहना केशव कृष्णवदन मातृभाषा पत्रकारिता सिरपा ११४५ या निति ईमेजकर्मी केके मानन्धरयात व ११४६ या निति नेपाल टेलिभिजनकर्मी शकुन्तला महर्जनयात लःल्हागु खः। लहना शर्मिष्ठा सुर सम्मान ११४५पाखे वरिष्ठ निर्देशक पवन जोशी व ११४६ या निति कलाकार आराध्यालक्ष्मी खड्गी यात सम्मानित याःगु खः। थुगु दँय् लहनां मदुम्ह पत्रकारपि सुशील बीरसिं कंसाकार व सुरेशकिरण मानन्धरया नामय् न पत्रकारिता सिरपाः लःल्हागु खः।

लहना सुशीलबीर सिंह पत्रकारिता सिरपाः ११४६ नेपाल समाचारपत्रया सहायक सम्पादक सुनिल महर्जनयात नगद. २० हजार नाप हनापौ लःल्हागु खःसा २५ हजार नगद राशी नाप हनापौ लहना सुरेशकिरण पत्रकारिता सिरपा ११४६ पाखे वरिष्ठ कार्टुनिष्ट रविन साय्मियात लःल्हागु खः।

लहना वाःपौया प्रधान सम्पादक नृपेन्द्रलाल श्रेष्ठ व व्यवस्थापक सुरेन्द्रभक्त श्रेष्ठं थीथी पंगः व हाथ्या दथुइ न लहना वाःपौ थौतक मदिक पिहावया च्वंगु दु धका धयादीसे भविष्यय् मेमेगु सामग्री ज्वना वयेगु जुइ धका धयादीगु खः। सिरपा नाप हनेज्या लिपा सास्कृतिक ज्याझ्वः न जुगु खः।

Categorized in राष्ट्रिय