वंगु शुक्रबाः ओली पुचःया नेपाल कम्यूनिष्ट पार्टी (नेकपा) या वृहत जनसभा येँया नारायणहिति पिनेया सडकय् क्वचाल ।

नेवाःतय्सं थःगु नेवाः स्वायत्त राज्यया दावी यानावःगु नेपाःगाः दुनेया छगू थासय् नेवाः स्वायत्त राज्य बी मखु धाइगु राज्यसत्तां हे थःगु शक्तिया दम्भ क्यनाः छन्हु न्ह्यःनिसें हे पुरा सडक बन्द यानाः जनसभाया नां नामं सभा यानां क्यन । थुकीयात कयाः समीक्षा वा विश्लेषण आः मयाय् । आःयात छपा किपाया जक खँ ल्हाय् । ओलीया सभाय् ब्वति काय्त प्रदर्शनलिसें वःगु छगू पुचःया किपाय् लाखय् प्याखं हुलाः वयाच्वंगु नं खनेदत । थुगु किपालिसें थीथी न्ह्यसःत नं दंगु दु । थुगु किपायात सामाजिक संजालय् इनेवं मनूतय्सं न्ह्यसः तय्गु न्ह्याकल । थ्व लाखय् अकुन्हु नेवाः एकता दिवसय् ख्वनाय् थ्यं ला नं धाल ।

उकिया नापं आः छु लाखय् नं ओली वा प्रचण्डया ईशाराय् प्याखं ल्हुइम्ह जुल ला धकाः नं न्ह्यसः तल । लाखय् नेवाः तजिलजिलिसे स्वानाच्वंगु छगू महत्वपूर्ण सांस्कृतिक पात्र खः । थुकिया छगू ई विशेषया महत्व ला दुगु हे जुल । व ल्याखं लाक्वपाक्व यग्गु इलय् लाखय् पिकाय् ज्यू कि मज्यू धइगु नं न्ह्यसः दनि ।

लाखय् धयाकथं येँयाःबलय् पिदनीगु मजिपाः लाखय् लुमनावइ । उकिया नापं यलय् मिप्वाः लाखय् नं दुसा सायाः लाखय् नं दु । थुकिया नापं मेमेपिं लाखय् नं दनि । व सकतां कथंया लाखय् गुबले गुकथं पिकाय्गु धइगु निश्चित नियम दु । व कथंया लाखय्यात थुकथं राजनीतिक ज्याझ्वलय् छ्यले ज्यू कि मज्यू धइगु नं छगू महत्वपूर्ण विषय खः । छगू दलया नं छगू गुट विशेषया ज्याझ्वलय् थुकथं लाखय् पिकाय् ज्यू कि मज्यू धइगु बिचाः यानाच्वनेमाःगु, सुइतं न्यं वनाच्वनेमाःगु विषय खः थें मताः । उकिया नापं यदि निश्चित धेबा कयाः छगू प्रोफेशन कथं थथे लाखय् पितहःगु धाय्गु सां आः धेबा बिलकि लाखय् न्ह्याथासं थ्यनीगु जुल ला नं धाय्थाय् दत ।

कन्हय् सुनां धेबा बिल धाःसा ब्यान्ड बाजा वनाः बाजं थाःवंथें सुयां ब्याहालय् नं प्याखं ल्हू वने जिल ला ? छगू समुदायिक विषय, छगू सामाजिक विषय तक नं मखु, राजनीतिक दलया प्रदर्शनय् थुकथं लाखय् पिकाय्बलय् कन्हय् लाखय्या महत्व म्ह्वः जुयावनीगु सम्भावना अप्वयावनी ।