सुआरेजया गोलं एट्लेटिको म्याड्रिड त्यात
पोहेलाथ्व नवमी ११४१, माघ ९ शुक्रवाः
लुइस सुआरेजं याःगु निगोलया हुनिं एट्लेटिको म्याड्रिडं स्पेनिस ला लिगा त्याकूगु दु ।
एट्लेटिकों एइवरयात २–१ गोल अन्तरं बुकूगु दु । वंगु चान्हय् जूगु कासाय् घरेलु पुचः एइवरया मार्को डिमिट्रोभिकं दयेकूगु सुरुवाती अग्रता कायम जुइमफुत ।
४०गूगु मिनेटय् सुआरेजं गोल यानाः एट्लेटिकोयात कासाय् लितहःगु खः । ८९गूगु मिनेटय् सुआरेजं पेनाल्टीमार्फत व्यक्तिगत निगूगु गोल यानाः एट्लेटिकोयात महत्वपुर्ण ३गु ल्या बिइकूगु खः ।
थ्वनाप एट्लेटिकों शीर्ष थाय्या ७गु ल्याया अग्रता कायम याःगु दु । छगु कासा म्ह्वों म्हितूगु एट्लेटिकोया १७गु कासापाखें ४४गु ल्या दत ।
निगूगु थासय् दुगु रियल म्याड्रिडया १८गु कासापाखें ३७गु ल्या दु । कासा बूगु एइवर १९गु ल्यानाप १५गूगु थासय् दु ।
Categorized in कासा
