येँया सुन्धाराय् धरहरा ल्यूने मस्जिद धकाः दावी यानावःगु जग्गा थुवाःत संचारमाध्यममार्फत न्ह्यःने वःगु दु ।

सुन्धारा धरहरा ल्यूने दक्षिणपाखे लाःगु व जग्गाया थुवाः रत्नकाजी महर्जन व जुजुकाजी महर्जनं जग्गा सम्वन्धि भ्वं, विभिन्न मितिइ जूगु येँ महानगरपालिकानिसें सर्वोच्च अदालतया फैसला आदिलिसें संचारमाध्यमय् न्ह्यःने वयाः थःपिनिगु मर्का न्यंकूगु दु ।

जग्गा थुवाः महर्जन दाजुकिजां बुधबाः येँय् पत्रकार सम्मेलन यासें देय्या न्यायालयं उगु जग्गा थःपिनिगु हे खःगु फैसला न्यंकाब्यूगु खुदँ बीधुंकलं नं थःपिन्सं आःतक्क भोगचलन यायेमखंगु धाल ।

पत्रकार सम्मेलनय् नवासें जग्गा थुवाः रत्नकाजी महर्जनं २०७२ असार ७ गते सर्वोच्च अदालतया वृहत इजलाशं तकं व जग्गा थःपिनिगु हे खःगु फैसला यायेधुंकूगु व पटक पटक फैसला कार्यान्वयन यायेत निर्देशन बीधुंकलं तकं महानगरपालिकां सर्वोच्चया फैसला कार्यान्वयनय् च्यूताः मक्यंगु द्वपं बियादिल ।

‘सर्वोच्च अदालतया वृहत इजलासं हे व जग्गाया स्वामित्व जिमिके दुगु फैसला यायेधुंकूगु दु व सर्वोच्च अदालत फैसला कार्यान्वयन समितिं न्याक्वःतक्क ला फैसला कार्यान्वयन यायेत निर्देशन बीधुंकल तर, येँ महानगरपालिकां धाःसा अवैध रुपं दयेकातःगु व टहरा थुनेत थौंतक्क च्यूताः मक्यंनि, थन सर्वोच्च अदातलया हे अपमान जूगु दु’ महर्जनं धयादिल ।

थ्वयां न्ह्यः पटक पटक यानाः येँ महानगरपालिका, पुनरावेदन अदालत यल व सर्वोच्च अदालतं तकं व जग्गा थःपिनिगु हे खःगु व अवैध रुपं दयेकातःगु टहरा थुनेत आदेश बीधुंकूगु दावी महर्जनया दु ।

‘२०५९ माघ १३ गते येँ महानगरपालिकां थम्हं हे नं व जग्गाय् दुगु टहरा थुनाबीगु फैसला यायेधुंकल, अझ २०६२ पुष २८ गतेकुन्हु न्हापाया फैसला बदर मजुइगु फैसला नं यायेधुंकल । थःगु हे फैसला कार्यान्वयन यायेत नं महानगरपालिकायात छाय् थाकूगु खः, थुइके मफुत’ महर्जनं अजू क्यनादिल ।

फैसला कार्यान्वयन मजूबलय् थःपिन्सं सर्वोच्च अदालत फैसला कार्यान्वयन समितिइ निवेदन बियागु व समितिं फैसला कार्यान्वयन यायेत २०७५ असोज १० निसें २०७७ कार्तिक २१ गतेतक्क यानाः न्याक्वः निर्देशन बीधुंकलं नं फैसलाया कार्यान्वयन मजूगु महर्जनया धापू खः ।

पत्रकार सम्मेलनमार्फत जग्गा थुवाः महर्जनद्वयं येँ महानगरपालिका प्रमुख विद्यासुन्दर शाक्य, कामपाया प्रमुख प्रशासकिय अधिकृत राजेश्वर ज्ञवालीयात सर्वोच्च अदालतया फैसला अविलम्ब कार्यान्वयन यायेत माग याःगु दु ।

नरेन्द्र बिक्रम राणाया नामय् जग्गा धनि पुर्जा दुगु उगु जग्गा सावित्री तिमिल्सिना व भेषराज न्यौपाने जुयाः २०६१ सालय् रत्नकाजी महर्जन व जुजुकाजी महर्जन दाजुकिजां न्यानाकाःगु खनेदु । व जग्गाया नियमित रुपं भूमिकर महर्जन दाजुकिजां हे पुलावःगु खनेदु ।

पटक पटक विवादित जुयावःगु उगु जग्गा मस्जिदया रुपं दुगु छुं हे कानुनी प्रमाण मदुगु व गुगुं इलय् मुसाफिर खाना जक खःगु जग्गाधनी महर्जनद्वयया दावी खः ।

Categorized in राष्ट्रिय